tgoop.com/jawadkr/179
Last Update:
واحسيناه.. خويه هذا اخر لقاء
واحسيناه.. استعدوا للبلاء
واحسيناه.. تنادي اسمع كربلاء.. واحسيناه
-------------------------------------
حسين ياتؤم جروحي يااعز من الهوه
اثنين چنه بروح وحده عشنه هالدنيا سوه
هذا حادي الموت طوح للگبر بيه نوه
وانت گبرك ياحبيبي ايحضرونه بنينوى
الله رايد.. ارحل وعينك تشوف
الله رايد.. مااحضرك بالطفوف
الله رايد.. بجسمك تصلي السيوف... واحسيناه
-------------------------------------
چانت ايدك تحضن ايدي من تحوطنه المحن
اسمين چنه بكلمه وحده حسين لوگالو حسن
راح نتفرق يخويه وراح يبعدنه الزمن
بيدك اتچفني وانت الذاري يصبحلك چفن
الغاضريه... گبرك واني البقيع
الغاضريه.. بيك تذبح چم ربيع
الغاضريه... تجني حتى اعله الرضيع.. واحسيناه
--------------------------------------
السم مرد چبدي واحسها چنها حانت ساعتي
بالعجل خليني اودع زينب وباقي اخوتي
خويه اوصيك بوصيه من تشيع اجنازتي
بالشمس خليني ساعه گبل دفني بحفرتي
ارد اواسي.. جسمك اليبقه وحيد
ارد اواسي.. من يضل فوگ الصعيد
ارد اواسي.. نحرك وگطع الوريد... واحسيناه
-------------------------------------
لاتجرد السيف خويه من يضربون النعش
خل تذكرني السهام بكربله ويوم اهدعش
بنحري مامرت سيوف ولاضگت طعم العطش
ولامشت خيل اعله صدري وصدري بالگاع انفرش
اهلي يمي.. وين ماانظر حبيب
اهلي يمي.. وجسمي سالم موخضيب
اهلي يمي.... لكن انت اتضل سليب... واحسيناه
------------------------------------
عظم الله اجرك يخويه وبيك عظملي الاجر
عليك يوم الغاضريه اقسى من هذا الامر
مدري اصبر دمعي لحضه مدري اوصيك الصبر
اليدفن بأيده اخيه ظهره حتما ينكسر
تحني ظهرك.. محنتي وتمسي جريح
تحني ظهرك... من ابو فاضل يطيح
تحني ظهرك... اختك بيوم التصيح... واحسيناه
----------------------------------
رايح وادري بعيالي الهوه بيهم مايمر
بغيبتي يشوفون وجهك مايشوفون الشمر
عيني اغمضها بوجودك يبقه مصيون الخدر
وانت عينك بالطفوف تراقب ادروب اليسر
مااشاهد... غير بس اخوه وعمام
مااشاهد...بعيلتي اتحيط اللئام
مااشاهد.. نار تحرگ بالخيام... واحسيناه
جواد كاظم الگرعاوي
BY جواد كاظم الگرعاوي
Share with your friend now:
tgoop.com/jawadkr/179