tgoop.com/jawadkr/14
Last Update:
اييمه...حاير ابين العده الوحدي
اييمه..من العطش والحر يبس چبدي
-------------------------------------------
الابن يايمه لوحار وكثر همه
ينسه اهمومه حين اليشتكي الأمه
ونه بحيره وعليه الدنيا متحزمه
وعليه الناس من كل صوب ملتمه
طاح اخوي وحيله ماضلت بعد عندي
اييمه..من العطش والحر يبس چبدي
-------------------------------------------
نكروني ييمه الگوم نكروني
جهلوني ولاچنهم يعرفوني
بغضاً بيه شرب الماي حرموني
وصرت من العطش ماشوف بعيوني
گلبي ضامي وناري مستعره وحق جدي
اييمه ..من العطش والحر يبس چبدي
---------------------------------------------
لون شفتيني ماضنچ تعرفيني
فضخ راسي الحجر والدم يغطيني
ييمه حرورة التربان تچويني
وسهم گلبي ضهدني وحيل ماذيني
يالحبيبه اعله الرمل نايم صبح خدي
أييمه..من العطش والحر يبس چبدي
--------------------------------------------
عمه عيوني وهدم حيلي نزف دمي
صرت نيشان لسهام العده ومرمي
اعاين خيلهم دارت على اخيمي
تمنيتچ ييمه بهالوضع يمي
وي العقيله تحامن اطفال وحرم بعدي
اييمه من العطش والحر يبس چبدي
-------------------------------------------
توسدت الرمل يايمه وسط الحر
وعليه بسيفه شمر النايبه يفتر
يروح ويرجع وعينه عله المنحر
وانه بعيني اراقب اهلي واتصبر
لوذبحني بالضعن شمر الخنا يحدي
أييمه من العطش والحر يبس چبدي
--------------------------------------------
زينب زيدت هم العلي همين
عله التل من شفتها شابچه الچفين
اسمع صوتها تنادي يخويه حسين
منين الحيل اجيبنه وگوم منين
لاتجيني جاوبتها الخيمتچ ردي
اييمه من العطش والحر يبس چبدي
جواد كاظم الگرعاوي
BY جواد كاظم الگرعاوي
Share with your friend now:
tgoop.com/jawadkr/14