tgoop.com/jawadkr/12
Last Update:
جرحك بالروح...ياسجاد ياسجاد
دمعك مذبوح...ياسجاد ياسجاد
گلبك من يوصل صبره
هالكون اتحير بمره..ياسجاد ياسجاد
---------------------------------------
هواي جروح روحك نخجل نعدها
ياچف. اليداويها ويضمدها
غير النوح ماضل كل ضمد عدها
جمره گلبك المدمع يبردها
دمعك سفاح..ياسجاد ياسجاد
بنوحك ترتاح..ياسجاد ياسجاد
صدرك مرسات العبره
هالكون اتحير بمره.....
----------------------------------
لربع صبرك فلا يوصل صبر ايوب
ودمع عينك تعده كل بچي يعگوب
بكل طيحه نجم مولاي شمعه تذوب
من عمرك وتدفن بالگلب محبوب
الاكبر من طاح...ياسجاد ياسجاد
كل عمرك صاح...ياسجاد ياسجاد
ليش الطبره عله الطبره
هالكون اتحير بمره.....
----------------------------------
الكسر ظهرك علم يم النهر مرمي
وجود مترب بدم الگمر مدمي
صحت فوگ الجسد ويلاه ياعمي
اليذبح روحي سهم العين مو سمي
بگلبك نارين...ياسجاد ياسجاد
رايه وچفين...ياسجاد ياسجاد
من يوم الطف مستعره
هالكون اتحير بمره
-----------------------------------
نحر حسين هو الهدم بيك الحيل
وحرم عينك يبو الباقر منام الليل
صدره الصار بالميدان ملعب خيل
خله دموعك ليوم الممات تسيل
صدره المهشوم...ياسجاد ياسجاد
ارداك اليوم....ياسجاد.ياسجاد
موبالسم مت بقهره
هالكون اتحير بمره
--------------------------------------
ذبح سهم الرضيع بدنيتك احلام
وخابت كل ضنونك من وگع جسام
ماتدمع عيونك تجري دم وايتام
تموت وتحيا من تذكر طريق الشام
روس وظلام...ياسجاد ياسجاد
بموكب ايتام...ياسجاد ياسجاد
الموت اهون حين اتذكره
هالكون اتحير بمره
-----------------------------------
ابد سم المنيه ماوصل روحك
ماهمك ولاگرب لعد سوحك
من يوم الطفوف انولدت جروحك
تموت بكل وكت ويرجعك نوحك
من تذكر حال..ياسجاد ياسجاد
سبي الاطفال...ياسجاد ياسجاد
بموكب عمتك متيسره
هالكون اتحير بمره
-----------------------------------
تنظر حال عمتك والدمع همال
ياشرع اليقر زينب بديها حبال
الم گلبك على احبابك يصدع جبال
سهم يوم الخرابه اتعنه الك چتال
طفله عله الراس...ياسجاد ياسجاد
گطعت الانفاس..ياسجاد ياسجاد
موقف هز شخصك بسره
هالكون اتحير بمره....
جواد كاظم الگرعاوي
BY جواد كاظم الگرعاوي
Share with your friend now:
tgoop.com/jawadkr/12