tgoop.com/iraqedunet/16170
Last Update:
بعد ٧٢ ساعة بس…
وتبدأ ليلة أول امتحان،
واني حوكف يمك واكلك : "كفيت ووفيت".
كل التعب، كل السهر، كل الروحات والرجعات،
كل صفحة قريتهه وانت نص نايم،
وكل دمعة نزلت لأنك حسيت الوقت ما يسعفك…
كلها راح تنجمع بهاللحظة، بآخر رمق، ببداية النهاية.
بعدها؟ محد راح يكلك "اقرَ"،
ولا "شدسوي؟"،
محد راح ينطيك ملزمة،
ولا تنتظر تنزيل كتاب،
ولا حتى تهتم لخبر نزل من الأستاذ الفلاني.
هاي آخر مرة تسمع نصيحة،
آخر مرة تراجع ويانا،
ويمكن آخر مرة تسهر لأنك خايف مو لأنك سهران بلا معنى.
وراح تشتاق…
إي، تشتاق للورقة، للون القلم،
للحچي، للسطر، للصوت اللي يكلك: "يلا گوم، وقرا".
وتشتاق النا…
إحنا "المساعد" او ماعرف شنو تصيح النا
يمكن نكون صفحة وتنغلق…
بس چنّا وياك خطوة بخطوة، تعب بتعب، نفس بنفس.
حاولنا نكون ضو، وحضن، وصوت بيه طمأنينة،
خلّينا بينّا وبينك أثر حلو…
أثر من النوع اللي ما يختفي، حتى لو خلصت الصفحة.
فـ گوم اليوم، وگول لنفسك:
"هاي خطوتي الأخيرة، وهاي ذاكرتي وياهم…"،
هـيـثـم وسـام 🤍
BY شبكة المساعد التعليمية
Share with your friend now:
tgoop.com/iraqedunet/16170