‌
«إذا دعَوتَ اللَّه أن يُبلِّغكَ رمِضان؛ فلا تَنسَ أن تدعُوهُ أن يُباركَ لكَ فِيه، فَليسَ الشَّأنُ في بُلُوغه، وإنّما الشَّأنُ في مَاذا ستعملُ فِيه».

• السّعدِيّ -رَحِمَه الله-.

من أهم صور الاستعداد لرمضان والتي لا ينتبه إليها كثير منا؛ الاستعداد النفسي
أن تتأهب نفسيا لاستقبال الفرصة الربانية التي تؤهلك للسبق والمنافسة ويمكنك إن أحسنت استغلالها أن تقطع مسافات ضخمة في رحلتك إلى الله ﷻ

هذا التأهب النفسي له صور متعددة لعل أبسطها أن تفكر..
أن ينشغل ذهنك ولو جزئيا وأن ترد عليه أفكار وتساؤلات..
ماذا سأفعل في رمضان؟
كيف سأتعرض لنفحاته على الوجه الأكمل؟
متى سيكون موعد وردي القرآني؟
وكيف سيكون حال تدبري ومدارستي؟
وهل سأعدد الختمات أم سأخصص وقتا أكبر للتدبر؟
كيف سأضبط الفرائض وأين سأصلي القيام؟
كم سأنفق من صدقات وكيف سيكون سهمي في صنائع المعروف؟
هذه عينات من أسئلة تدور في ذهن الذي ينشغل بهدف عظيم تلخصه كلمة واحدة.
الاسترضاء
إنسان هدفه الرئيسي = إرضاء مولاه
ولذلك يتساءل
وبذلك ينشغل ويهتم
ومن ثم يخطط بناء على إجابات هذه الأسئلة وغيرها

هذا التخطيط الذهني سيوقظ كثيرا من مشاعر الاشتياق للشهر العظيم
ودعاء "اللهم بلغنا رمضان" يساعد جدا في في هذا الإيقاظ
فما بين دعاء وتفكير وتخطيط = يستقيم السير ويسهل الانطلاق
حتى إذا مدَّ الله في الأجل وبلغ المرء اللحظة المنشودة؛ وجد نفسه متجهزا مستعدا
ثم انطلق..

-نقل.

4⃣
رمضان آخر روقان 🎆🌜

📝خطوات مهمة
تعالوا نشوف بعض الخطوات والنصائح العامة اللي ممكن تساعدنا علشان كل حاجة بنعملها في رمضان تكون باحتراف وروقان، وسبب في القرب من الله

1⃣  استعد جسدياً للعبادة
إزاااااااااي ؟؟
يعني تخيل نفسك رايح معاد مهم تقابل فيه شخصية رفيعة المستوى أو حد إنت بتحبه جداً ، تخيّل إنت بتجهز نفسك وبتتهيأ للمعاد ده إزاي ؟؟
طبعاً بتبقى في أحسن وأجمل وأكمل صورة 👔.
ولله المثل الأعلى، إنت في كل عبادة بتعملها بتناجي ربك الملك العظيم الجليل وبتُقبل عليه، فلازم تعظم الله جل وتعظم شعائر الله وتكون على أحسن حال، بإنك :

✅ تحاول تكون على وضوء قبل أي عمل
✅ ويكون فيه لبس نضيف ومكوي تلبسه حتى لو في البيت
✅ والمكان اللي هتقعد فيه يكون نضيف ومرتب وهادي ومفيهوش ملهيات .. ويا سلام لو خصصت مكان لكده
✅ وترش معطر جو أو تتطيب بأفضل عطور عندك ..
• جرب الكلام ده وهتشوف أثره الرائع على قلبك
قال تعالى: ﴿وَمَنْ يُعَظِّم شَعَائِرِ اللَّه فَإِنَّهَا مِنْ تَقْوَى الْقُلُوب}

2⃣ استعد نفسياً للعبادة
إزاااااااااي ؟؟
يعني وإنت رايح تعمل أي عبادة تكون رايح لها بنفس، رايح لها باشتياق، رايح لها باحساس إنك محتاج للعبادة دي ، إحساس واحد مريض وتعبان ودي جرعة الدوا اللي محتاجها علشان تريحه

إحساس إنك رايح تستمتع ، مش يبقى كل همك إن الحاجة دي تنقضي وعايز تستريح منها بأي طريقة !!
مش بتعمل حاجة إنت مغصوب عليها ‼️لا دي حاجة إنت اللي محتاجلها ، ومتلهف عليها كمان ! مش روتين !! مش وقت بتحاول تعديه وخلاص !

يعني مثلاً وإنت رايح تجيب المصحف علشان تقرأ الورد بتاعك ، تخيّل كده وهيّأ نفسك كأنك رايح تفتح أغلى هدية🎁 جاتلك في حياتك من أحب صديق لك وتقوم تبص له كده وتبتسم وتضمه لصدرك وإنت فرحان ، وتلاقيك أول ما بدأت تفتح المصحف ، قلبك اتفتح معاه هو كمان، وصدرك انشرح للقراءة ، وبدأت تستمتع من قبل ما تقرأ حتى أي آية

وهكذا في كل العبادات وفي كل حاجة في حياتك

حاول تستمتع بكل حاجة بتعملها
حاول تعمل كل حاجة بروح ونفسية جديدة.

يتبع،،

٢٠ يوم تفصلنا عن نفحات الخير والرّحمات، والبركة.

فيا باغي الخير أقبل، وتأهب
وأعِدَّ زادك، وأصلح قلبك.

ويا من غلبته نفسه، واستحوذ عليه الشيطان فأنساه ذكر ربه
قم، وانفض عنك غبار الكسل
قم وطهِّر نفسك من الذنوب التي ملكت قلبك.

النعيم لا يدرك بالنعيم، ومن أراد الآخرة سعى لها.

5⃣
رمضان آخر روقان 🎆🌜

📝تابع خطوات مهمة

3⃣ استعد قلبياً للعبادة 
إزااااااااي ؟؟ يعني مهد الطريق الأول 🛣وافتح أبواب🚪 قلبك ؛ علشان تعرف تدخل في جو العبادة من البداية .. 
مش على ما تقعد تحاول تحضر في قلبك تكون العبادة خلصت وإنت لسه يا دوب بتقول يا هادي !!
 
يعني لازم تشغل موتور العربية🚘 ، وتمشي شوية في الأول علشان يبدأ الموتور يسخن ، وبعدين تنطلق بقى زي ما تحب .. 
 
وكذلك قلبك .. حاول تستحضره الأول بعبادة بسيطة وخفيفة، علشان تعرف تدخل في جو عبادة تانية ويبقى إحساسك فيها عالي وقلبك خاشع ودماغك مركز ومش مشتت ، وتنطلق وتعيش معانيها بفضل االله

فمثلاً ....

✅ قبل صلاة الفريضة ، تكون في المسجد وتصلي تحية المسجد أو السنة القبلية .. 
✅ قبل القيام ، تقعد تستغفر ١٠٠ مرة ..
✅ قبل ما تقرأ القرآن ، ممكن تصلي ركعتين خفيفتين .. 
✅ تسمع درس مؤثر ، وبعدين تقوم تستغفر ..
✅ تقول أذكار المساء بهدوء كده ، وبعدها تبدأ دعاء لحد المغرب ..
وهكــــــــــــذا.

يتبع،،،

6⃣
رمضان آخر روقان 🎆🌜

📝تابع خطوات مهمة

4⃣لابد من وجود الدافع والحافز

أكتر حاجة بتخلّي الإنسان زاهد في الشئ اللي معاه ، هي :
عدم معرفة قيمة الشئ ، وعدم إدراك أهميته ! يعني لو واحد لقى جنيه ذهب على الأرض ، ولكنه مش عارف يعني إيه دهب ، هيسيبه ويمشي ولا هيبص له ‼️
إنما اللي عارف يعني إيه دهب بجد ، هيجري عليه بكل قوته وهيبذل كل جهده علشان يحصل عليه !

ولذلك قالوا:
من عرف قدر الجزاء ، صبر على طول العناء ومن عرف حلاوة الأجر ، هان عليه مرارة الصبر
ومن عرف قيمة ما يطلب ، هان عليه جميع ما يبذل

وعلشان كده الناس لما عرفت قيمة
الثانوية العامة وقيمة العربيات 🚘والعمارات🏢 والشاليهات، هان عليها التعب والسهر والصبر من أجل الحصول عليها !!

✅وإنت كمان لازم تقرأ وتسمع دروس وتحمّل مقاطع عن فضل العبادات وثوابها ومكاسبها وأرابحها اللي محدش يتخيلها، تعرف قيمتها وقدرها وأهميتها في دنيتك وآخرتك .

مش معقول واحد صايم وميعرفش حديث واحد عن فضل الصيام!!
ولو سألته يقولك الصيام ده حاجة حلوة وربنا أمرنا بها !!
لازم تقرأ وتسمع وتعرف الفضائل علشان تستحضرها في نيتك وكل ما تزوّد في النوايا ، تزيد الهمة ، ويزيد الأجر ...
ده إنت لو عرفت أحاديث فضل الصيام ، مش هتبطل صيام !
وهتبقي مُستمتع بالجوع والعطش وإنت صايم !!
لو عرفت أحاديث فضل الصلاة، هتجري على الجامع من قبل ما تسمع الأذان ومش هتبقى عايز تخرج منه أبدا !!!

✅ معرفة فضائل الحاجة اللى هتعملها من أكبر الدوافع والمحفزات على التلذذ بالطاعة والصبر عليها والتمتع بها..

يتبع،،

7⃣
رمضان آخر روقان 🎆🌜

📝تابع خطوات مهمة

5⃣ إحساس المرة الأخيرة

من أهم خطوات اتقان العبادة والخشوع فيها والإحساس بمعانيها؛ تهيئة النفس إنه المرة دي هتكون آخر مرة هتقوم فيها بالعبادة

أصلاً وصية حبيبنا النبي ﷺ لنا لما قال :
( اذكر الموت في صلاتك ، فإن الرجل إذا ذكر الموت في صلاته لحري أن يحسن صلاته ، وصَلّ صلاة رجل لا يظن أنه يصلي صلاة غيرها ) صحيح

⬅️ فلو حسيت بقلبك إن ده آخر رمضان لك في الحياة ساعتها هتبقى قاعد متشوق له وعينك عليه .. خايف على كل دقيقة فيه .. وهتتعبد فيه وإنت في قمة المشاعر

⬅️ لو حسيت إن دي آخر صلاة لك في الدنيا وبعدها خلاص هتموت، هتلاقي دماغك مركز وقلبك حاضر بنسبة ۱۰۰ ٪، وهتلاقيك نسيت
كل حاجة كانت بتشغلك وبقيت خاشع، ودموعك بتنزل وجسمك بيرتجف من الخوف والرجاء ..

إحساس المرة الأخيرة ده هيخليك تعمل العبادة بروح عالية جداً ومشاعر مختلفة تماماً ...

وكل ده مش هييجي إلا لما يكون عندك يقين إنك ممكن تموت في أي لحظة بدون أي أسباب أو مقدمات .

فحاول توصل بقلبك للإحساس ده عن طريق ⬅️ كثرة زيارة المقابر، وتشييع الجنازات ، وسماع دروس عن الموت وخاصة موت الفجأة


6⃣ إدي العبادة حقها

يعني إيه ؟؟ يعني لو عرفت تحدد وتخصص وقت للعبادة يبقى تمام، بحيث تقدر تجمع فيه قواك العقلية والجسدية وجميع الحواس في العبادة

طيب لو معرفتش ؟؟ يبقى ما تروحش للعبادة وإنت مش فارقة معاك وناوي تكرّوتها علشان مستعجل وعايز تنجز، إديها حقها ومتستخسرش وقت أو جهد أو تركيز .. وإلا مستحيل هتعرف تحس بلذتها ومعانيها ...

❎ فاللي قاعد يدعي ربنا وهو ناوي يقول الدعوتين اللي حافظهم وينجز ، ده عُمره ما هيشعر بمعاني وروح الدعاء

❎ اللي ماسك المصحف وهو مستعجل وهمه إنه يوصل لآخر السورة ، وقاعد يحسب عدد الصفحات اللي باقية له ، ده عمره ما هيفهم أو يتأثر أو يتعايش مع القرآن

❎ اللي داخل يصلي وهو عايز الصلاة تخلص قبل ما تبدأ أصلاً علشان يلحق المشوار أو الماتش أو المذاكرة، ده عمره ما هيعرف يتلذذ أبداً بالصلاة ولا يحس بالخشوع

✅ فحاول ما تبقاش مشغول في وقت العبادة، وياريت تديها شوية اهتمام وتركيز وجهد علشان تقدر تحقق مضمونها وتوصل للذّتها.

يتبع،،،