tgoop.com/hhuu124/1024
Last Update:
عطشناك وخيمنا صارت عيون
وبچيناك بدمع متغير اللون
تلوج اگلوبنه اعليك
مدري شبيك ما بيك
عطشناك وخيمنا صارت عيون
…..……..
عطشناك وعطشنا مو على الماي
عله الخوه الحنينه وذيچ الفياي
عله الچلمه الگلتها وظلت وياي
عله دگت صدر دگاها وفاي
عله امك من توصيك
خواتك لله وليك
علي وياك وعليك المعضله تهون
عطشناك وخيمنا صارت عيون
………١…….
نطرناك وعليك ارواحنا تلوب
ووجوه الزغار شموع واذوب
يا باب الفرج لا تغلگ البوب
بطى العباس چنه اصيح الگلوب
لا نگدر نتانيك
لا يمنا ونحاچيك
نطرناك وحسبنا شلون وشلون
عطشناك وخيمنا صارت عيون
……..٢………
عتبناك بعتب ما يشبه عتاب
يشبه حال ثكله ولزمت الباب
ما ندري يخويه امن الهوى الهاب؟
هاج اتراب خيمتنه، امن العتاب ؟
مدري اتراب رجليك
اجانه وبيه طاريك
مشه وياك واجانه يصيح يم عون
عطشناك وخيمنا صارت عيون
…….٣…….
سمعناك من اجتنا بصوتك الريح
وصار الحال كون تريد توضيح
بيدر ذرته چفوف المراويح
مثل حوم الفراش اعله المصابيح
حامت روح اهاليك
توافيها وتوافيك
سمعناك وعلينه اتغير الكون
عطشناك وخيمنا صارت اعيون
……٤……
گصدناك ونهونه بچعب الرماح
وبنص المعسكر گبّر اصياح
طلعن من خيمهن والعلم طاح
ها لاح الخيال الما گبل لاح
هذا الحال ياذيك
والچلمات تشجيك
گصدناك وغصب گالو تردون
عطشناك وخيمنا صارت عيون
…….٥………
نخيناك بنخاوي لشخصك تلوگ
من هدت علينه الوادم تبوگ
نخيناك بوكت صعدونه عالنوگ
ومن طبن خواتك زحمة السوگ
بس عيون تربيك
بس گلوب تبچيك
نخيناك وغدو كلهم يشتمون
عطشناك وخيمنا صارت عيون
……..٦……..
ذكرناك بخرابه بغير بيبان
وبظهور اليتامه السوط نيشان
لسان الحال گال بطولت السان
ما مش عوز يشبه عوز الاخوان
لو يمنا ونراويك
إدينا، ونلزم ايديك
وكت ذاك اوكت هذا ويعيلون
عطشناك وخيمنه صارت عيون
……..٧……….
#سيد نعيم آل مسافر
BY حسام الغراوي.
Share with your friend now:
tgoop.com/hhuu124/1024