tgoop.com/firyjgssMeropmm/6716
Last Update:
🔥 اصدار حصري وجديد حديث مع نعي حزين ومفجع لاولاد مسلم عليهم السلام من ديوان الصوت الحسيني 👈 ٢ج 🔥🔥
الف لا حول ولا قوه الا بالله العلي العظيم وسيعلم الذين ظلموا ال بيت محمد اي منقلب ينقلبون والعاقبه للمتقين رحم الله المتقين من يومنا هذا الى يوم الدين
يبقى ذكرك على مر العصور يتجددا
جيل بعد جيل يقام لك العزاء
انت حسينآ ابن سيدي الاوصياء
وتبقى صرختنا مدى الحياه
حسين ياحسين... حسين ياحسين
نعي
ننعه لمصابك دوم يحسين
ما تنشف ابد يا دمعه العين
انت ابن الحياده والسلاطين
➖➖➖➖➖➖
انعازي الزجيه لزهره امك
يمن عالكاع ظل يسيل دمك
بخيل انهشم يحسين عظمك
انا لله وانا اليه راجعون عظم الله اجورنا واجوركم يا شيعه يا محبين بيوم اولاد مسلم ابن عقيل لما قتل اصحاب الحسين واهل بيته ولم يبقى سوى الاطفال والنساء هجموا الاعداء على بنات الرساله لقد احرقوا الخيام وسلبوا النساء وروعو الاطفال حتارت مولاتنا زينب بين تروح للاجساد الذي بقيت موذره وبين تلم العيال وبين تطفى النيران تلم زينب يا طفل يا طفله كلها تتصارخ عمه زينب عمه زينب اطفال وخافت من هجمت الخيل من النيران الملتهبه بس اتصوري تلك الحاله اروحلج فدوه وخلي حالج حال زينب شراح يكون حال زينب وهي مكسوره ومنفجعه وحيلها منهد على فقد العزاز زينب انشده بالها لما جن الليل اخذت تتفقد الاطفال واذا باولاد مسلم ابن عقيل ما هم وي الاطفال اكو ملاحظه اخواتي اولاد مسلم ابن عقيل مو اولاد زينب احنا هسه لماشي عندنا نعي اللطم بان زينب امهم بس هي لا زينب تكون خالتهم امهم رقيه اخت زينب بنت الامام علي عليه السلام بس لعظم المصاب كثره الفاجعه التمركز كله على مولاتنا زينب لان هي صاحبه الفاجعه الاليمه اخذت زينب تنادي دورت عليهم ماكو زينب وين تروح تحشم من تنخى من يفزع لها لا اهل كلهم نومه لا ناصر لا معين بس الاعداء اخذت تنعى وتقول روحي لها الفداء
نعي
كوم الحك عليه هنا يعباس
هجمت علينا كوم الارجاس
ضليت حرمه بين هالناس
➖➖➖➖➖
طاهر ومطهر فاكدينه
كوم الحك علينا يا ولينا
جيب الولد عباس لينه
➖➖➖➖➖➖
ضاع الولد من هجمت الخيل
يعباس ما ظلي بعد حيل
تلهب بالكلب نار المداليل
➖➖➖➖➖
نار الولد بالكلب تسري
حكه اليوم دمع العين يجري
لعب بيه يخويه وخان دهري
➖➖➖➖➖➖
هذا كلام
يا احباب كلبي يوم الولد ما ينحمل الولد قطعه من القلب الله يساعد قلب مولاتنا رقيه يوم فقدت اولادها فقدت الاثنين في وقت واحد من بعد فقد اخوانها واهلها وما جرى عليها نواسيها ونعازيها ونعلي الونه وياها على اللي جرى بيهم
هذه الابيات نعي على طريقة الشيخ النمساوي
يمه يعينها اليوم
الفكدت ولدها يعينها اليوم
يمه والحيل مهدوم
ضلت تون والحيل مهدوم
يمه مالوم مالوم
ضل الكلب للغالين مالوم
➖➖➖➖➖➖➖
يمه الضايع ولدها
ياحالها الضايع ولدها
يمه يجري اعله خدها
بس الدمع يجري اعله خدها
يمه كلش مردها
يوم الولد كلش مردها
➖➖➖➖➖➖
يمه واعليه نحيله
ضلت تون واعليه نحيله
(اي حكهه حكهه من تون ام الولد)
يمه للغالي تسيله
دمع العين للغالي تسيله
يمه شنهي اليشيله
افراك الولد شنهي اليشيله
➖➖➖➖➖
يمه تربي الاولاد
سمعنه الوالده من تربي الاولاد
يمه للكبر يراد
للعازه الولد وللكبر يراد
يمه ساكن بلوهاد
ازغير الولد ساكن بلوهاد
➖➖➖➖➖➖
هذا عن حال امهم اما عن حال الاولاد لما اتى بهم الظالم الى شط المسيب واراد قطع رؤوسهم وهم اطفال وصغار يخافون من لمعه السيف وهم اطفال تتراوح اعمارهم بين الخامسه او سبع سنوات اطفال من بعد السجن والفراق والعذاب اتى بهم الظالم لقطع رؤوسهما ويلاه اخذ واحد ينظر الى الثاني امهم بعيده عنهم اهلهم كلهم ضحايا في كربلاء
نعي
اليوم الزغير شلون حاله
والسيف ليهم يوم شاله
ون الولد والدمح ساله
➖➖➖➖➖➖
شلون الولد كبل المنيه
ضلت دمعته اعلخد جريه
وعينه اعله درب امه ا ربيه
➖➖➖➖➖➖
شحال الصبايا وكت الوداع
اثنينهم من هوو للكاع
ما يمهم محب ويكون فزاع
➖➖➖➖➖➖
والوالده يا من يكلها
واعله الجرف مذبوح املها
بالدنيا عكب الولد شلها
➖➖➖➖➖➖
ركاب الصبايا مكطعيها
وبالشط جثثهم شامريها
ما رد الولد من راح ليها
➖➖➖➖➖
نعي كرناوي
صدك من عيني غابو يالمداليل
مالهم بعد للدار جيه
صدك طول الولد من عيني شو غاب
ضلت جمرته تلهب سريه
احا يانار فكده تجوي الضلوع
اونن ونتحب صبح ومسيه
ياناس الولد للعازه مريود
بعده ازغير وشايلته المنيه
حسبت احساب بيهم لن يكبرون
يوفون التعب والدين اليه
تالي من وكت شالو للگبور
عليهم دمعتي ضلت جريه
وي اعزاز كلبي صار الفراك
ضيعت الولد وابعد عليه
اووويلاه صحت من نار كلبي
تمت✍️ الشاعره والمله ام حسين العامري
غير مبري الذمه من يحذف اسم الشاعره وينسب الكلام له
https://www.tgoop.com/firyjgssMeropmm
BY قناة الشاعره ام حسين العامري
Share with your friend now:
tgoop.com/firyjgssMeropmm/6716