tgoop.com/eltuz2022/31975
Last Update:
ДХХ РАИСИ НЕГА ҲАЙДАЛДИ?
Элтузга келаётган хабарларга кўра, Давлат Хавфсизлик Хизмати раиси Абдусалом Азизов вазифасидан олиб ташланган.
У Ўзбекистондаги энг қудратли идорани беш йилдан кўпроқ вақт давомида идора қилди.
Унгача Абдусалом Азизов Ўзбекистон Мудофаа вазири вазифасини бажариб келаётганди.
Абдусалом Азизов ДХХга раис этиб сайлангач унинг ўрнига генерал Баҳодир Қурбонов Мудофаа вазири этиб тайинланганди.
Бу гал ҳам шундай бўлди. Абдусалом Азизов ўрнига ДХХ раиси этиб Баҳодир Қурбонов келди.
Давлат Хавфсизлик Хизмати ёпиқ ташкилот ва у ердаги ўзгаришлар оммага ҳадеганда ошкор этилавермайди.
ДХХ раисининг олиб ташланишига эса жудда жиддий асос ва важлар бўлиши керак.
Элтузнинг бир биридан мустақил манбалари хабар беришича, ДХХ раисининг вазифасидан ҳайдалишига ўтган ой Президент администрациясининг собиқ мулозими Комил Алламжоновга қилинган суиқасд уриниши сабаб бўлган.
Шу йилнинг 30 сентябрида Президент Администрациясидан кетгунига қадар Комил Алламжонов президентнинг тўнғич қизи ва ёрдамчиси Саида Мирзиёева сиёсий фаолиятининг ҳар бир босқичида унга ҳамроҳлик қилиб келди.
Президент сўзчиси бўлган, кейинчалик Ўзбекистон ахборот сиёсати учун маcъул шахснинг ҳаётига суиқасд, шунчаки оддий жиноят эмас, балки президентга қарши саботаж эди.
Аммо бу ҳақда бирон расмий идора ёки оммавий ахборот воситаси лом мим демади.
Бош прокуратура суиқасд бўлгани ҳақида хабар билан тийилди холос. Ва яна бу идора асосан жим туринглар, исботланмаган хабарларни берманглар дея огоҳлантирди. Огоҳлантиришга огоҳлантирди, аммо ҳеч қандай дастлабки фаразни илгари сургани йўқ.
На Алламжонов раҳбарларидан бўлган президент администрацияси ва на мамлакатдаги хавфсизликка маъсул қудратли ДХХ бу борада изоҳ бермади.
Шундай экан ДХХ раисининг ишдан олинишини кутилмаган воқеа деб бўлмайди.
Комил Алламжоновга ҳужумдан салкам бир ой ўтиб Элтуз таҳлилчиси Рассом Туз мамлакатдаги фазо ҳақида гапираркан бир нарсалар бўлади дея башорат қилганди:
«Бугун Тошкент зоҳиран тинч. Аммо Тошкент итлари занжирини узиб осмонга қараб увилламоқда.Нимадир ўзгаради.”
Бу ўзгариш ўзини куттириб қўймади.
Абдусалом Азизовнинг вазифасидан олиб ташланиши Президент Шавкат Мирзиёевнинг ДХХ фаолиятидан мутлақо норози эканини кўрсатади.
Элтузга келаётган ҳозича тасдиқланмаган хабарларга кўра, Азизов билан қаторда яна кўплаб юқори мулозимлар вазифасидан бўшатилган.
Алламжоновга суиқасднинг парламент сайловидан бир кун олдин юз бергани куч тизимлари Ўзбекистонда хавфсизликни таъминлай олмаётганига яққол далилдир.
Бу ҳолат эса мамлакат олий қўмондонини қониқтирмаслиги турган гап.
