tgoop.com/dragii/4414
Last Update:
فرض العشگ صلينه
للحومه من طبينه
ذوله احنه الانصار
*
حيى عله الحب الصدگ
من صلّه بينه ابو العشگ
ماردنه عنه نفترگ ...الا بذبحنه
هوّسنه يم رب الخيم
والكافل ابچفه العلم
استاذ بالحب والقيم ....نوّر گلبنه
مر اعله عابس العلم واعلن غرامه
شگگ ثِيابه من شهگ عطر الامامه
اعقل مجانين العشگ فاز بهيامه
حين الدخل للحومه
ذب الدرع واهدومه
ذوله احنه الانصار
***
بالواقعه حبنه كبر
من شفنه موتتنه فخر
نتسارع الگطع النحر...فدوه العشگنه
هوه العشگ رايد دمه
وكون الحبيبه ايقدمه
واحدنه گلبه سلمه.......لمن شبگنه
چاغير الحسين العشگ وابن الرساله
لازم نموت ابهل مسه كلنه ابداله
بعيون ابو اليمه ضَهر نور الجلاله
لازم نضحي دونه
فدوه الجمال اعيونه
ذوله احنه الانصار
*
شاف الحقيقه ونعجب
عاف المسيح ولن ذهب
وبعشگ ابو اليمه انصلب ..وهب الكُلابي
وحر وزهير وعوسجه
من سيوفهم محد نجه
من طب حبيب الكل اجه...الاكبر صحابي
يدرون ابن ظاهر شهم والكل تهابه
تربات حيدر والنعم حسبو احسابه
شايب وماينگدر شنهي ابشبابه
من عشگه من حميته
بالدم صبغ لحيته
ذوله احنه الانصار
**
المعشوگنه انطينه عهد
ويعرفنه مانخلف وعد
شنريد من عنده بعد ... فادي حياته
ارماح وبواتر من تسل
بصدورنه انصد البل
بس كون ابو اليمه عدل.... ويتم صلاته
خلص صلاته واشتعل طف المنايه
وصار طوفان الدمه بحبه ضحايه
آيات طحنه اعله الارض آيه اعله آيه
وحسين شن الغاره
واخذ ثار انصاره
ذوله احنه الانصار
**
بس العشگ ماينتهي
وياكم اشگد نشتهي
بهاي الخدامه نلتهي....ونحيي مصابه
واعله المنابر ننتچي
وبحسين مَخلص الحچي
نلطم سوه ونشبع بچي...الشيبه وخضابه
نتمنه وياكم نجي ابجو الخدامه
وندخل ابنص العزه ونصير لطامه
هنايله كلمن النذر عمره الامامه
هالخدمه اكبر نعمه
والخادم اكبر زلمه
ذوله احنه الانصار
***
عمار حسن الدراجي
BY قناة الشاعر عمار حسن الدراجي
Share with your friend now:
tgoop.com/dragii/4414