tgoop.com/dchhtg/8506
Last Update:
لطميه حماسيه للامام علي عليه السلام
حملت عنه...لاتفاركنه... يحيدر
رد يوالدنه....انت مضمدنه....يحيدر
🌙🌙🌙🌙🌙🌙
عنه وين تريد شايل يالوصي
تبجي كلهه اعليك بويه ياعلي
اخلاف عينك تدري باجر ننولي
اعليك اليتامه...لطمت الهامه...يحيدر
رد يوالدنه...انت مضمدنه...يحيدر
🌙🌙🌙🌙🌙🌙🌙
منهو ينشد عاليتامه لو رحت
اجت للمحراب كلهه من طحت
وين عنهه تريد يابويه صحت
تبجي وتنادي...تصوب افادي....يحيدر
رد يوالدنه...انت مضمدنه...يحيدر
ام حسن الشعيبي
🌙🌙🌙🌙🌙🌙
وين شايل ياعلي هاي المسيه
تضل هالايتام دمعتهه جريه
من يمر بيهه يحماي الحميه
من يمر بيهه...وينشد اعليهه...يحيدر
رد يوالدنه...انت مضمدنه...يحيدر
✍️ ام حسين العامري
🌙🌙🌙🌙🌙🌙
عدي بويه اعتاب وياكم يهلنه
لاتشيل اليوم بويه من نزلنه
ابد مانحمل بعدكم يااملنه
روحي مالومه..... وحيل مهدومه....يحيدر
رد يوالدنه...انت مضمدنه....يحيدر
✍️ ام علي السماوي
🌙🌙🌙🌙🌙🌙
بويه ياحيدر عليك امعلمين
لاتيتمنه يبو كلب الحنين
وعلى امصابك هاليتامه مكدرين
تنعى بدارك...ضلت احبابك...يحيدر
رد يوالدنه....انت مضمدنه...يحيدر
✍️ ام ازهر مناذره
🌙🌙🌙🌙🌙
الدار تنعى والحزن بين عليهه
راح ابو الحمله علي ومارجع ليهه
وتبجي زينب واليتامه مايجيهه
صاحو ابونه...خابت الضنه...يحيدر
رد يوالدنه...انت مضمدنه...يحيدر
✍️ جنان الحسناوي
تمت بفضل الله وعونه بأقلام شاعرات رابطة قتيل العبرات غير مبري الذمه من يحذف الاسم اويغير الكلمات وينسبها له علما ان القصيده سجلت في دفتر الزهراء
https://www.tgoop.com/dchhtg
BY الشاعرة الملة جنان الحسناوي
Share with your friend now:
tgoop.com/dchhtg/8506