Йўлда баланд тоғларнинг ўртасида маҳаллий туристлар “Магазин” деб атайдиган ташландиқ бинони кўрдик. Жуда зўр жойга қурилган – икки қаватли бино айвонига чиқсангиз мағрур Қизилнура тоғининг оқ кийган чўққилари шунақанги гўзал бўлиб кўринадики, бир умр шу ерда қолгингиз келади. Биринчи қавати 2 хонали, 2-қавати айвондан иборат қўш иморат 1991 йили кончилар томонидан қурилган. Орқа тарафида хўжалик бинолари ҳам мавжуд. Ташландиқ бино ҳозир ҳам саёҳатчиларнинг севимли масканига айланган. Фавқулодда ҳолатларда бинодан бошпана сифатида фойдаланса ҳам бўлади – ҳатто ўтин печкаси ҳам бор.

Режа бўйича машинада денгиз сатҳидан 2500 метргача кўтарилишимиз керак эди. Лекин яқиндагина очилган йўл орқали 2650 метргача бемалол кўтарилдик ва шу ердаги кенгроқ жойга машинани қолдирдик.

Тушлик учун овқатларни машинада қолдирдик, чунки қарийб 1 километр масофа ва 150 метр кўтарилишни ортда қолдирган эдик. Ортиқча юкни юқорига кўтариб чиқишдан не фойда? 2 литр сув ва енгил рюкзакни олиб, соат 7:30 да йўлга тушдик. Аслида машина билан 2750 метргача чиқса бўлади, лекин у ёғи тошлардан тозаланмагани учун таваккал қилмадик.

Денгиз сатҳидан 2950 метргача йўл нишаблиги унчалик баланд эмас. Кейин қорли участкалар ва кескин кўтарилиш бошланади. Айрим жойларда қор уюми, кейин қиррадор тош ва шағалли ҳудудлардан кўтарилиб, тоғнинг қиррасига чиқиб олдик. У ёғига унча баланд бўлмаган сўнгги кўтарилиш ва биз биринчи чўққидамиз.

Йўлда кўп дам олишлар, суратга тушишлар билан соат 10:00 дан ошганда денгиз сатҳидан 3303 метр баландликда жойлашган Анна77 чўққисига етиб келдик. 3,5 километр йўл юриб, 650 метр баландликка кўтарилдик. Чўққидан Қизилнура чўққиси ва унинг кичик чўққилари яққол кўриниб туради. Тоғ қирралари бўйлаб қалин қор уюмлари ҳали эримаган.

Чўққининг номи қизиқ-a? Айтишларича, инсульт оқибатларини енгиб ўтган 77 ёшли Анна исмли аёл ҳаётдаги ҳар қандай қийинчиликларга дош бера олишини исботлаш ваўз иродасини синаб кўриш учун номсиз чўққига кўтарилиш учун Ўзбекистонга келади ва шу чўққини забт этади. Унинг шарафига чўққи Анна77 деб номланади.

40 дақиқалик дам олиш ва фото-видео танаффусдан сўнг кейинги номсиз чўққи сари отландик. Аввал 50 метр пастлаб, сўнг яна 70 метр юқорига кўтарилиб, чўққининг энг баланд жойига етиб келдик (3321 метр). Шу ерда дўстларга маслаҳат солдим. Яна тўрт километрлик масофа, 300-400 метр кўтарилишга рози бўлсанглар, навбатдаги Реваш чўққисига ҳам бориш мумкин. Қайтиш учун ҳам яна шунча ҳаракат қилиш керак бўлади. Шериклар таклифни бир овоздан қабул қилишди.

Соат 11:20 да навбатдаги чўққи томон йўлга тушдик. Бунинг учун аввал 300 метр пастлаб, сўқмоқ бўйлаб Реваш довонигача етиб бордик. Довоннинг терскай томонида 5-6 метр қалинликдаги қор уюми йиғилган. Шунинг устида қишни эслашдик. Муздеккина қор устидан юриб, салқинлаб олдик. Бу ёғига чўққигача кескин кўтарилиш. Энг қийин жойидан ўтиб, соат 12:50 да Реваш чўққисига (3227 метр) чиқиб бордик. 5 соату 20 дақиқада 3 та 3000 метрдан баланд чўққига чиқиш ҳозирча шахсий рекорд бўлди.

Реваш чўққисига аввал чиққанман – Ангрен тарафдан, анча қийин маршрут билан. Ўшанда 32 км йўл юргандик. Бу сафар чиқиш анча осон кечди, алҳамдулиллаҳ. Пастдаги Музбел довонида қор уюмлари орасидаги мавсумий кўл ҳали қуримабди. Узоқдан Бобойтоғ, Қорақуш чўққилари кўринмоқда.

Шериклар – Фахриддин ака, Шаҳром, Акбар, Музаффар бу чўққига илк марта чиқиши. Уларнинг хурсандлигини кўриб, мен ҳам завқландим. Бу шавқ, бу завқни фақатгина қийинчилик билан чўққига кўтарила олган одамларгина ҳис қилиши мумкин.

Одатда чўққидан тушишда баландликка кўтарилиш жуда кам бўлади. Бизда эса яна 300-400 кўтарилиш бўлди ва биз бу машаққатни ҳам маза қилиб босиб ўтдик. Ҳаво ҳарорати 15-18 даража, кўпинча булут қуёшни тўсиб бизга соя беради, доимий шабада – ана шундай гўзал об-ҳаво бизни янаям юриб, кўпроқ ҳаракат қилишимизга ундади. Сафар давомида 15,4 километр юриб, 1344 метр кўтарилдик.

Тошкент – Паркент – Кумушкон – Оқсоқотасой – Оқтахта – Анна77 – Реваш
2025 йил 17 май

Батафсил видеоси: https://youtu.be/XMkP0RN2VUc

Telegram | Instagram | Youtube | Facebook | X

Бу манзарани кўриб беихтиёр "Субҳаналлоҳ! Не гўзал яратмишларинг бор!" девораркан одам. 12 километрлик оғир йўл, 1700 метр кўтарилиш, тош ва шағалли сўқмоқсиз тик йўллардан заҳмат билан чиққанингдан кейин қаршингда кенг довон ва қуйидаги манзарани кўриб, сўзларинг ҳам самимий чиқаркан.
Ишонаверинг, бу манзарага Швейцарияю Патагонияларни алмашмайман.

Батафсил видеоси: https://youtu.be/85Psgv-AuQE

Telegram | Instagram | Youtube | Facebook | X

Мендан кўпинча: "Тоғда йиртқич ҳайвонлар чиқиб қолса нима қилиш керак? Хавфли эмасми?" — деб сўрашади. Бу савол ўринли, чунки табиат бағрида юриш нафақат гўзал манзаралар ва руҳий ором, балки айрим хатарларни ҳам ўз ичига олиши мумкин. Аммо шуни унутмаслик керакки, ҳар бир таҳликанинг ўз ечими, ҳар бир хатарнинг ўз эҳтиёт чораси бор.

Шу йил қишда Муҳаммад Одил билан тоғ сафарлари, табиат бағридаги ажойиботлар, уларда яширинган ҳаётий ҳикматлар, инсон қалбини ўзига мафтун этадиган жиҳатлар; ҳаётга янги назар берадиган сукут ва синовлар, таҳлика, таваккул ва эҳтиёт чоралари ҳақида гурунглашган эдик.

Табиатни, унинг Эгаси яратган мўъжизаларни кузатиш, руҳий ва жисмоний сукунат ичра сайр қилиш, шаббода чайқатган дарахт шивирлари ва қушларнинг майин овози билан ўйга толиш — буларнинг ҳар бири инсон ичидаги шовқиндан халос этади. Тоғлардаги сукунатда ҳаётнинг тўлиқлиги бор. Бу жимлик шовқинли дунёда унутилган ҳақиқатларни қайта ёдга солади.

Батафсил суҳбат: https://youtu.be/Q8QPEjt-_dg