tgoop.com/aymwc/2714
Last Update:
#تراث
اليوم أبو ابراهيم سيد اكوانها
گوظ أوناحت إنسها وجانها
ــــــــــــــــــــــــــــــــــــــ
گوض اليوم النبي او داره بگت
موحشه او لجله الديار اتگدرت
والملايك ناحت الفگده او بچت
والجنان أو حورها او ولدانها
ــــــــــــــــــــــــــــــــــــــ
اليوم مچدر اصبح الفگده السمه
گام يبچي او للخطب يمطر دمه
وشمسه صايبها الكسوف او مظلمه
والأرض لبست عليه احزانها
ــــــــــــــــــــــــــــــــــــــ
لبست اثياب الحزن لجله الأرض
واظلم الكون وبچه اعليه الفرض
واحنه نبچي اوهالمياتم ما تفض
للقيامه والحزن عنوانها
ــــــــــــــــــــــــــــــــــــــ
للقيامه انضل ننوح او ما نمل
حيث من يوم ارتحل سيد الرسل
حل باهل بيته وباهل وده الكتل
وردت الأمة تَعبَد أوثانها
ــــــــــــــــــــــــــــــــــــــ
شتتوهم بین مسموم اوچتیل
او بين مسجون او غده ایون او عليل
وبين بديار الغرب اصبح نزيل
او منها ذاهت وضربت وديانها
ــــــــــــــــــــــــــــــــــــــ
هاي حالة عترة الهادي الرسول
اصبحت بالهم عگب عينه تجول
ريت يالهادي تجي اتشوف البتول
تبچي ضلت والحزن ديدانها
ــــــــــــــــــــــــــــــــــــــ
او من حزنها ابواب صارت للحزن
منها ضلت عترة الهادي تون
هذا شارد ذاك محجور ابسجن
او هذا خايف من غدر عدوانها
ــــــــــــــــــــــــــــــــــــــ
أمهم الزهره الگضت بأخطر أمر
حاله بيها ايضيج من عدها الصدر
بيها كثره اجروح وأعظمها الكسر
ضلت ابگلب المحب نيرانها
ــــــــــــــــــــــــــــــــــــــ
اه يا ضلع الزجيه او كسرته
اه ياذاك الجنين أو طيحته
اه يا حامي الحميه او عبرته
اه يدمعة زينب أوجـروانـها
ــــــــــــــــــــــــــــــــــــــ
اه يونات الحسن حين النظر
للزچيه الوالده أو دمعه الحدر
اه يا الحسين النده ظهري انكسر
حين شاف امه عليها اچفانها
ــــــــــــــــــــــــــــــــــــــ
شيعوها ابليل والمدمع يسيل
من دفنها اشلون حماي الدخيل
او يم گبرها اشلون صار الهم عويل
زلزل الدنية أو هدم اركانها
الشاعر المرحوم ناعي الزهراء
السيد جاسم الطويرجاوي
BY قناة الرادود علي الصالحي
Share with your friend now:
tgoop.com/aymwc/2714