tgoop.com/aymwc/2680
Last Update:
أذّن آذان المشي بالراية
وللحُسين اتعنّت المشاية
٠٠٠٠٠٠٠
طلعت امن البصره اول قافله
عالجدم مشايه كلها لكربله
امن البحر حد النحر متواصله
نواسي زينب بالمسيرة الغايه
٠٠٠٠٠٠٠
هلا بزوار الحسين المؤمنه
على اعناد اهل الحقد متراهنه
هالسنه اكثر عدد من كل سنه
والنعم شيعة علي وفايه
٠٠٠٠٠٠٠٠
بالزيارة نترس دروب المشي
ما يوگّفنه التعب شيعة علي
الموت لجل حسين عدنه احله شي
نضحّي ونّول الكرامه بهايه
٠٠٠٠٠٠٠٠
مثل امواج البحر نطلع سوه
مشي نوصل للذبيح ابنينوه
للحُسين المات ضامي وماروه
فزعت الشيعه واجت عنايه
٠٠٠٠٠٠٠٠
احنه معروفين شيعة حيدره
بالصداره نبقى والباقي وره
بالشجاعة عدنه سبع الگنطره
الشيعه بسمه بالوفه مسمّايه
٠٠٠٠٠٠٠
ما نهاب الموت ما نخشه الخطر
يمشي ويانه الامام المنتظر
هذا ممشانه على مر الدهر
مو قليله الشيعه صرنه هوايه
٠٠٠٠٠٠٠
لاشك المهدي يشاهد شيعته
بالمشي ويانه رفت رايته
يعطف علينه بحنانه ورحمته
نظرة المهدي ودعائه كفايه
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
BY قناة الرادود علي الصالحي
Share with your friend now:
tgoop.com/aymwc/2680