tgoop.com/aymwc/2524
Last Update:
يا عباس اسمع وصيت امك
:::::
اعگـــــد رايتي وخليني اشوفك
اريــــــدك كون تگطعهن چفوفك
مـــــا ريـــــــدن يمنعنك ظروفك
اذا عفـــت الحسين وليدي اعوفك
اعگد شيلتي وخل انظــــرك زين
بعد هـــــاي العقيله برگبتك دين
اريدك تنذبح گـــــــدام الحسين
يستاهل اخــوك اگطعله چفین
يا عباس شد حيلك وعزمك
:::::
اهزنــــــك قبل مــــا تقبل تنام
اله حسين يدخل وسط الخيام
اريد حسين يمك خاص والعام
صير احزام يبني وشد الحزام
دنگ من تحاچي حسين ممنون
دنگ راسك وغمضها العیـــون
كلشي يهون بس حسين ميهون
انت واخوتك لحسين ترحون
يا عباس وحسين كل همك
::::
افتـــــح عينك ولا تطبگ ارمــــوش
ما ريــــدن خبر يوليدي مـــو خوش
وديلـــي خبـــــر وتوصــله الطروش
الحوش بلا حسين يصير مو حوش
گبل حسين لا تشتــــــم هوه الهاب
دنــــــگ اذا اســــــم حسين ينجاب
ولدي احباب وحسين اغله الاحباب
راح اگضي العمر منتظره عالباب
يا عباس خليني اشتمك
:::::
وصيتي الك يوليـــــــدي الاخيره
ارفع راسي يا بـــــــدر العشيره
اريــــــــدن زينب تظل الاميره
مـــــا ريد استمع اختك أسيره
اختك يبنــــــي راحـــة بالها وياك
اريدك وين مـــــــا تنــــــدار تلگاك
خلي عالشريعه يرفـــــــرف الواك
جيب المــــــاي اذا زينب وتنخاك
يا عباس يم النهر دمـــــــك
:::::
باچر ناعي يوصــــــل لم البنين
يخبرني عليكم وادمــــــع العين
عوف الولد خبرني اعله الحنين
رفعو بالرمح راس ابنچ حسين
وبعد زينب مشت مسبيه للشام
ومحترگه بعد مــــا ظلت خيام
بقت يم العقيله اطفال وايتام
تنتظرين المـــــن ميته الأحلام
يا عباس كون انه هم يمك
:::::
علي جبار الكعبي
الفاتحه لوالدي
BY قناة الرادود علي الصالحي
Share with your friend now:
tgoop.com/aymwc/2524