tgoop.com/aymwc/2522
Last Update:
إستقبال الضعن
شدّوا الحـــــيل خلّونه نمشيلة
ضعن حسيــــن طب كربله الليلة
***
ذنّي حسين ايّامه
ويتنطّر خدّامــــه
متعب خل نمشيله
ويّاه نبني اخيامه
بين الحَر والهيمــة
حزّم دمعـــك غيمة
من تحظر للمجلس
يضخن فيّ الخيمة
يمّه الشوگ يامحـــــلى ترتيله
ضعن حسين طب كربله الليلة
**
لاتســــــتعظم روحك
سافرله اوي جروحك
بس حــط ايدك بيده
اتحده الموت يلوحك
ضيع بتعب اعــــيونه
واشرب حــزنه ولونه
بلكي حسين يحسبك
واحد مـــــنّ اضعونه
خاف اتضيع شد حزنك بشيله
ضعن حسين طب كربله الليلة
****
من بوصلة العاشر
حدّد دربك باجــر
لازم تِتِعب جدمك
بلكي اتعثر الحافر
من تتوضى ابدمعك
تلگى الكون ايسمعك
من صحراءك للحب
حب حسين ايطلعك
وجمر الآه مـــن يطفـى هفّيله
ضعن حسين طب كربله الليلة
****
من ايحـــــــبّك ربّك
ويختصّك و ايقربك
لازم لـ اَبن الزهـــرة
شايف جمرة ابگلبك
شنهي اللذة َبعـمره
الماباچي بهالعَشرة
كلّه ايضيع اليوگـع
منّ عيون الزهــرة
من ايطيح ياهـــــــو اليتچيله
ضعن حسين طب كربله الليلة
*
ليش امأخر نفــسك
بيد حســين اتمسّك
بس اُخلص واتوكّل
من اهدومه ايلبسك
لچن مـو بس تنحب
لو رايد لي تگــــرب
حسين ايريد الخادم
من يتعـــــب يتأدّب
هيچ ايريد يالناوي تبچيلــــــه
ضعن حسين طب كربله الليلة
كاظم عبد الحسين الحولاوي
BY قناة الرادود علي الصالحي
Share with your friend now:
tgoop.com/aymwc/2522