tgoop.com/aymwc/2516
Last Update:
طب عليهم كفيلي …… طَب عليهم
ماجَت الحُومَه بأهلها ……طَب عليهم
****
من برز ليها أبو فاضِل شِردت اجيوش العده
واحد بواحد تِرادم مِن خَزرته و هيبته
سَحب سيفه وگام يحصِد بالرؤوس الاگته
هذا اخو زينب تقدم والنعِم من غيرته
و هَد عليهم گمر هاشم…… هَد عليهم
ماجَت الحُومَه بأهلها …… طَب عليهم
****
مِثل حَيدر بالمَعارك ما يثَني ضَربته
الزِلم ضاعَت يوم عاشِر تَحَجبت من شافِته
رايته بچَفه ويقاتل مِن ينكِس رايته؟
شَرر تِطاير عيونه وعرج نَط بگصته
وجوه صَفره و بالرُعب …… نازِل علِيهم
ماجت الحومَه بأهلها …… طب عليهم
****
رَايد الماي أبو فاضِل وگِصَد صوب المشرَعة
حاوطِته ألاف أُمُية، رايده بس تمنَعه
شَد عليهم برَق يرعِد وگتل كلمَن واجَهه
وصَل للماي ابو فاضل و نار گَلـبه موَلِعة
و مِثل يوم القارِعة …… و نازِل عليهُم
ماجت الحومة بأهلها …… طب عليهُم
***
غَرف غَرفه ماي يشرَب بَعد مانهَد حِيله
و ذَكر عَطش حسين أخَيه و الوَعد لسْكينه
تسَلي عبدالله وتگله عمك يرد لينه
خِلص بالإيثار طبعه و بالمروءة اسنينه
رمى الماي و مله الجربه …… وللخيم ناوي يجيهم
ماجت الحومه بأهلها …… طب عليهم
****
بعد ما اشتد الوطيس و عجزوا يلاگونه
و انتهت كل الحِلول و رادوا يوگعونه
بالغدر همه طبعهم گدروا يصيبونه
من النخل گطعوا يمينته وبالنبل صابوله عينه
ومسك سيفه باليسار …… وهد عليهم
ماجت الحومه بأهلها …… طب عليهم
****
ما اهتم قطعوا يمينه وضل يقاوم بالشمال
همه هو الماي سالم كون يوصل للعيال
واجه الجيش بشهامة وجندل ابطال القتال
لكن الغدرو سجيه اگطعو چفه الشمال
و بالعمد هشموا رأسه وصابوا الجربه بـ سهام …… لعنه الله عليهم
ماجت الحومه ……بأهلها طب عليهم
****
الفارس من يطيح بأدييه يستعين
وانت لايسره بگالك لايمين
صاح يا خويه أدركني يا حسين
بلا كفوف والسهم عاميله عين
وشد عليهم ابو الاكبر…… شد عليهم
ماجت الحومه بأهلها…… طب عليهم
****
من دنه يمه ابو الاكبر وخله رأسه بحجره
ضنه فارس من العسكر رايد يگص نحره
گله يا فارس تمهل بلكي احسيني اخبره
ودمعت عين ابو الاكبر لمن سمع عذره
كله اخيك هذا انا ضمه واشتم عطره
وللخيم لـ أخيته زينب راد يحمل…… جسمه ليهم
ماجت الحومه بأهلها…… طب عليهم
****
الشاعر: خادم الحسين سجاد الاسدي
BY قناة الرادود علي الصالحي
Share with your friend now:
tgoop.com/aymwc/2516