tgoop.com/aymwc/2494
Last Update:
سكنه ورقيه شبگن عليه
من ودعنّي من ودعنّي
،،،،،،،،،
انه ابچي وهنه يبچن والمدامع هاملــه
والسوالف مني اكبر چانت بگد كربلـــــه
ادري ابوي ايحب رقيه وكلفتها بمسأله
حاچي الحسين ارد اروحن يختي وي العايله
لو ماكو محمل انه امشي اقبل
انحب لگنـّـــي من ودعنّــــــــي
،،،،،،،
گامن گبالي خواتي ولمن هدوم السفــــر
وهم مثلهن گمت المّن والگلب توّه ابتشر
ولنْ علي الأكبر اجاني وگالّي وگلبي نگسر
يگول ابوي حسين تبقه وچامتت من القهر
گتله انه بتكـــــم وشگد احبكــم
يبچن اجنـــــــــي من ودعنّــــــــي
،،،،،،،
للمهد رحت بدمعتي وگمت أحچي وي المهد
گتله ياعبد الله رايح عني ماشوفك بعد
حرمله باچر يذبحك وبسهم ليك استعد
شفته فل اگماطه ليّه ومن سمع صوتي گعد
عمري اعله عمرك اسم الله اعلى نحرك
طف سمعنّــــــــي من ودعنّــــــــــــــي
،،،،،،،
زينب اتعنتني تبچي وشبگت عليه ابالـم
وين ودتني بحضنها الكربله وحرگ الخيم
وأجه العباس وشبگني وگمت اشم بچفوفه شم
مسح دمعاتي الأهلها الكافل بطرف العلم
ياعمي تــــــدري مو انت عمـــــري
اشگد روعنّـــــي من ودعنّــــــــــي
،،،،،،،
توادعت وي كل خواتي وبركن بيتي اگعدت
انه ابچي وكلها تبچي وردت اموت ومامتت
گومي شبگي عليه گومي صوت ابوي انه اسمعت
جثه اعله ركبه وحضني ومن دمعته تبللت
حسين بدمعته يرسم غربتـــه
لاتمشي عنـّي من ودعنّــــــــي
،،،،،،
لخادم الحسين ع
محمد الفهداوي
BY قناة الرادود علي الصالحي
Share with your friend now:
tgoop.com/aymwc/2494