tgoop.com/aymwc/2274
Last Update:
#شهادة مولانا القاسم أبن الامام موسى ابن جعفر صلوات الله عليهم
غريب وغربته بانت على عيونه
أجه من موطنه عن لا يعرفونه
نـازح مــن مـدينة جـده وأبآئه
أجه لأرض العراق الديره مامونه
أبن راهب بني هاشم.... نزح من دولة الظالم
خفه حتى أسمه ياويلي.. الغريب أتصيح أله الوادم
عاش بالغربه وبعد بالغربه مات
چان يسقي الناس من ماي الفرات
يختلي ويه النهر يبچي وينوح
ويذكر حسين وشفاها الذابلات
.............
هظمتي الغربته ودمعاتي لمصابه
حداني الشوگ أله وجاباني يم بابه
على أعتابه أسجدت والدمعه بعيوني
لـحــد مــا أمـنـّت دمـعـاتي بعتابه
أزوره أشعر أنه بمشهد.. أهيم ودمعتي اعله الخد
اخو المعصومه والسلطان... رزقني بدمعه ماتبرد
أدخيله أندبه بشدتي عم الجواد
يومه يكسرني وعليه ألبس سواد
قـاسم الخير وبـعـد بـاب العطاء
يزوره حتى الطير هم ياخذ مُراد
............
سكن بين الغرب وتوقره الوادم
يخلص ليله راكع ساجد وقائم
عمل بس بالسقايا مو عبث هايه
اكو سر بالسقايا عد بني هاشم
القصد يذكر عطش جدة.. ماأعرف شنو قصدة
هم بالجربه يسگي الماي.. لو شي ثاني أكو عندة
چان لمن يعتني الشاطي بضماه
على جروفه ينحني ويحچي معاه
ينعى عالظعن العطش بالطف غريب
الطاح سگايه أولا واحــد رواه
............
جرح من كربله عاشرهن أيامة
ويحچي البنته عن حسين وأيتامه
ويگل البنته عنده بعمرچ بنيات
فرن بالفله من حرگو أخيامه
يگلها أحنه النبي جدنة.. وشياطين البشر ضدنه
قدر وتحتم أعلينا... نموت بغربه وحدنه
وصه بنته تروح دار أهله الغريب
وللمدينه من تطب يعله النحيب
مات بالغربه نعم بس شيعوه
أندفن لا مگطوع نحره ولا سليب
........................
✍🏻. حسين حمدان الدلفي
BY قناة الرادود علي الصالحي
Share with your friend now:
tgoop.com/aymwc/2274