tgoop.com/amAli30/14935
Last Update:
وصيتي ليش اتركتوها
وصيتي يالخالفتوها
يوم الحشر لو صار يسألهم المختار
وصيتي ليش اتركتوها
ـــــــــــــــــــــــــــــــــــــــــــــــــــــــــــــــــ
أحاديث النبي التاريخ يرويها
سند عن الأئمه و نلتزم بيها
الروايه تگول يوم الحشر هاديها
يحاسب هاي الأمه و يعتب اعليها
محمد و بصوت الحكمه
محمد يعتب عالأمه
ويحاسب الأشرار يسألهم المختار
وصيتي ليش اتركتوها ..(٢)
ـــــــــــــــــــــــــــــــــــــــــــــــــــــــــــــــــ
الدنيا تنگضي و يوم القيام احساب
لو ناشدهم الهادي يريد جواب
يا ضلع الذي كسروه خلف الباب
وليش النار شبّت والجنين انصاب
يناشد وبعينه العبره
يناشد عن حال الزهره
وليش هجمتوا عالدار؟ يسألهم المختار
وصيتي ليش اتركتوها ..(٢)
ـــــــــــــــــــــــــــــــــــــــــــــــــــــــــــــــــ
هاي المحكمه المعبود يعلنها
بصفحه امدوّنه وحيدر يدونها
والهادي يناشد أمّته عنها
ليش اهجمتوا عالزهره شصدر منها؟
مصايب تظهر بالمحشر
مصايب دونهن حيدر
عن لوعة البسمار يسألهم المختار
وصيتي ليش اتركتوها ..(٢)
ـــــــــــــــــــــــــــــــــــــــــــــــــــــــــــــــــ
محمد ينشد وهالوادم يسمعوه
يگلهم ليش ضلع الطاهره اتكسروه
شسبب حتى الفدك من فاطمه اتغصبوه
و بنار الضلاله لدارها تحرگوه
عليمن لوعتوا الزهره
عليمن و غدرتوا العتره
عن حالة الاطهار يسألهم المختار
وصيتي ليش اتركتوها ..(٢)
ـــــــــــــــــــــــــــــــــــــــــــــــــــــــــــــــــ
بعد عنده سؤال الهادي عن حيدر
يگلهم ليش بعتوا الفحم بالجوهر
وليش المرتضى عن منصبه اتأخره
تغصبون الأمير وغيره يتأمر
يناشد هالناس الجارت
يناشد عالحاله الصارت
وعن موقف الكرار يسألهم المختار
وصيتي ليش اتركتوها ..(٢)
ـــــــــــــــــــــــــــــــــــــــــــــــــــــــــــــــــ
- وصيتي
الرادود | باسم الكربلائي
الشاعر | الأديب جابر الكاظمي
الكاتب | الميرزا محمد المياحي
من اروع القصائد الحزينه المتنوعه التي تشد العزاء تحصلونه بقناة العبرة الحسينية
https://www.tgoop.com/amAli30
BY قناة العبرة الحسينية
Share with your friend now:
tgoop.com/amAli30/14935