tgoop.com/alialhmedey/11583
Last Update:
اشتاكت عيوني لشوفتك. يلمهدي وعيوني تصب
بلندبه ادعيلك كمت. لهفي على المتغرب
اشتاكلك وكت العصر. من الابو لبيته يطب
نلتم ونبجي على الخيم. يل بلخيم مترب
يلمهدي جدك من تسلب ثوبه
عمتك تركض ركضت المتعوبه
___________________
رد المهر صوب الخيم. ملوي السرج شافنه
وبلا شعور اتراكضن. من الخيم كصدنه
جالس على صدره الشمر. السيف على نحره تدنه
سكنت انفاسه وونته. مجفي النحر وصلنه
عفنه الخيام بلا زلم منهوبه
عمتك تركض ركضت المتعوبه
___________________
شمطببك بين الخيم. نار وركض بخيامك
يلمهدي لحك على الحرم. توهن مشن كدامك
عثرن تره بنص الدرب. افزع وفك الثامك
يدولبن فوك الهزل. خافن تطيح ايتامك
باخوانها تضل المره منكوبه
عمتك تركض ركضت المتعوبه
___________________
يل النازحين من الخيم. غربه وخرابه تلمكم
يتصطرن من التعب. وسوط الشماته يطشكم
باب القصر يتلاوذن. عيون الغرب تلجمكم
ماتخلص دروب السبي. بس الهظم عاشركم
لون العبي من الضرب مكلوبه
عمتك تركض ركضت المتعوبه
___________________
حاير وونك ماخلص. مرسومه بعيونك هزل
بديار غربه شمنتظر. واهلك كضو كلهم كتل
ماتنسى ولا تنضهم. نسوان مكيوده بحبل
عجل وثارك مابرد. من زلم هاشم ضل نسل
تبقى الزلم من سطرتك مرعوبه
عمتك تركض ركضت المتعوبه
✍️علي ناظم الحميداوي
https://www.tgoop.com/alialhmedey
BY الشاعر علي ناظم الحميداوي
Share with your friend now:
tgoop.com/alialhmedey/11583