tgoop.com/algorane/3386
Last Update:
رئيسيه لمولاتي سيدة العفه والعفاف العقيله زينب (صلوات الله عليها). اسم القصيدة ( كلش تعباچ )
ارتاحي يم عون بالموت الأجاچ
سـوط المتـون كلش تعباج
ارتاحي زينب بالگبر
امن الخرابه واليسر
كلش تعباچ
"""""""""""""""""""""""""
ارتاحي من ركض الركضتيه وغمضي عيونچ
بعـد مـاكـو شـوك حـافي اعليه يرگضونچ
والگبر ما بيه سوط ويضرب امتونچ
ولا خـيـم بـيه وخـايـفـه منهن يطـلعـونـچ
ولا سبي بيه ولا صعده اعله نوگ
ارتاحي بالموت من طبت السوگ
حجار ماكو وينشمر
امن الخرابه واليسر
كلش تعباچ
""""""""""""""""""""""""""
بعد متركضين زينب وحدج بهيمه
وما يضلچ بال كل ساعه عله يتيمه
وما يحرگونه عليك الگبر كالخيمه
كبرج خمسين شيبه العاشر وضيمه
الگبر ما بيه ناس وتهد خيل
ولا أكو حسين ويدوسنه حيل
ولا ضلع بيه ينكسر
امن الخرابه واليسر
كلش تعباچ
""""""""""""""""""""""""""
العليل الشرح قصتچ بالحچي اليأتي
يگول حسره تبچي أجاهه وگالهه اسكتي
أجه وبيده الرمح وبچعبه ضرب عمتي
كربله الكتلتچ انتي ما أضَن متي
من تموتون لو سم لو طعن
وقاتلچ ذاك المجلس أضِن
ذابحچ يم الخدر
امن الخرابه واليسر
كلش تعباچ
"""""""""""""""""""""""""""
الگبر وترابه زينب امن اليسر راحه
انتي اول طير ردله إبموتته اجناحه
واليصيح إبگبره ياهو يسمع إصياحه
ومن يمنعچ لو يطگچ ابچعبة ارماحه
وعزه تسوين بكيفچ للحسين
وضلي ابچي لو للأربعين
ماكو شي اسمه جبر
امن الخرابه واليسر
كلش تعباچ
""""""""""""""""""""""""""
إلونهه خليهه ترجع عينچ الحمره
حومرت من السهر وعجاجة الصحره
امن اليسر للگبر ربچ بيچ من اسره
خاطر عيونچ تنام براحه لو مره
وما تشوفين خيمه وبيهه نار
وامن السطوح يشمروچ بحجار
ولا حبل بيدچ يجر
امن الخرابه واليسر
كلش تعباچ
""""""""""""""""""""""""""
كربله الغيرت لونچ زينب انسيهه
وبعد مو گعده صلاتچ وگفه صليها
بس ورد بالجنه مو جمره تدوسيها
عله اجتاف العرش مو نوگ التصعديهه
وما تضيعين بالهيمه بنات
ولا تركضين إلشاطي الفرات
وبعد ميضربچ شمر
امن الخرابه واليسر
كلش تعباچ
""""""""""""""""""""""""""
رزقهم آل محمد دخيلهم
✍/ محمد جوراني.
BY الشاعر الحسيني محمد الجوراني
Share with your friend now:
tgoop.com/algorane/3386