tgoop.com/alaa66klf/37750
Last Update:
لهلال محرم//أذّن بلال
من وزن الموشح
شعر.. دكتور كاظم چاسب المعقلي
♕♕♕♕♕♕♕♕♕♕♕♕♕
حانت أيام العَزا وهل الهِلال
نادى حيَّ اعلى الحزن أذَّن بِلال
♕♕♕♕♕♕♕♕♕♕♕♕♕
طلع شكله ومو شكل كل الشهور
بي حزن بي فاجعه وصابه الفتور
يشرح أعظم وقْعة صارت بالدهور
ياشهر بي فگدت الشيعه البدور
وراحو أصحاب المكارم والكمال
نادىٰ حيَّ اعلىٰ الحزن أذّن بلال
♕♕♕♕♕♕♕♕♕♕♕♡♕
أذن وصاح المؤذن بالنداء
صارت المعموره طف وكربلاء
الشيعه رفعت كلها رايات الولاء
بكل كتر موكب حزن ماتم عزاء
وهالشعائر بينا تخلد لا مُحال
نادىٰ حيَّ اعلىٰ الحزن أذَّن بلال
♕♕♕♕♕♕♕♕♕♕♕♡♕
هالشعائر تبقى آلاف السنين
كربله بكل موسم آهات وأنين
ياهلال المرتبط بالضاعنين
ضعنو وعافو ديار ام البنين
وظلت الذكرىٰ ابجفاهم والخيال
نادىٰ حيَّ اعلىٰ الحزن أذَّن بلال
♕♕♕♕♕♕♕♕♕♕♕♡♕
تدري ليلة هلّتك ليلة هموم
من أصدلك تسري بدماي السموم
بالسنين اشما تمر حزنك يدوم
شيعتك چنها ابعدن گبرك تحوم
چنها بالعاشر تشوفك عالرمال
نادىٰ حيَّ اعلىٰ الحزن أذَّن بلال
♕♕♕♕♕♕♕♕♕♕♕♡♕
ياهِلال الهل على الدنيا ابجروح
هذا يسچب دمعِتَه وذاك الينوح
تنعىٰ ضنوة فاطمه وتفديله روح
رفعت الرايات اله اترف عالسطوح
ولافتات انخطت ابحبر الجلال
نادىٰ حيَّ اعلىٰ الحزن أذَّن بلال
♕♕♕♕♕♕♕♕♕♕♕♡♕
ياهلال ابكل سنه اجروحك تزيد
چنه بيك الطف يرد يرجع جديد
چن نعيش ال بالطفوف ونستزيد
نذكر حسين ابوفا ونلعن يزيد
وللشعاير نمتثل اعلى امتثال
نادىٰ حيَّ اعلىٰ الحزن أذَّن بلال
♕♕♕♕♕♕♕♕♕♕♕♡♕
يبقى عاشور الحزن رمز الأباة
الرفضوا الذل والمهانه ابهالحياة
ويبقى الحسين الأبي وتخسا الطغاة
حي رغم موته الحُسين وغيره مات
خالد ابرغم العصور ولايزال
نادىٰ حيَّ اعلىٰ الحزن أذَّن بلال
♕♕♕♕♕♕♕♕♕♕♕♡♕
يبقى حي ابن الزچيه ومايموت
فاتت اسنين وبعد أكثر تفوت
ينظر الخدامه ال اتنعته ابنعوت
هذا يلطم هذا يصرخ بأعلى صوت
هذا ناعي الينعى ربات الدلال
نادىٰ حيَّ اعلىٰ الحزن أذَّن بلال
♕♕♕♕♕♕♕♕♕♕♕♡♕
https://www.tgoop.com/alaa66klf
BY قناة بستان الألحان الحسينية
Share with your friend now:
tgoop.com/alaa66klf/37750