tgoop.com/alaa66klf/37056
Last Update:
اشكر فضلك يابواليمه (وزن عگيلي )
فضلك مايتجازه بچلمه. اشكر فضلك يابواليمه
من بير الظلمه مطلَّعني وللدرب الصح اترجعني
اشكر فضلك يابواليمه
★★★★★
چم مره تگلي وچم مره. هلدرب الواضح لتغَيَّرَه
من فعل الموزين اتبره. ومن الطايح إخذ العبره
تخاف ايامي اطيح ابظلمه الچانت نور وخير ورحمه
متخلي الدنيا اتضيعني. للدرب الصح اترجعني
اشكر فضلك يابواليمه
★★★★★
يابواليمه اتفكر بيه. من جور الدنيا المگضيه
متأكد كلك حنيَّه يابواليمه اتخاف اعليه
تخاف اعليه هموم الغربه والدنيا الغداره الصعبه
والشر لورايد يتبعني. للدرب الصح اترجعني
اشكر فضلك يابواليمه
★★★★★
رايد علباطل ما اجامل ومايشغلني على الحق شاغل
ومنصف وي الناس وعادل ورفض دوم الراي الباطل
بمدرستك رايدني اتعلم وبروحي كل شر يتهدم
اعرف كل قصدك تنفعني. للدرب الصح اترجعني
اشكر فضلك يابواليمه
★★★★★
لوصارن صعبات أيامي. وبعيد اتوديني اوهامي
والگه الصح موصح گدامي ومااعرف خطوات أجدامي
يمي الگاك بيوم المحنه من تاخذني چفوف الفتنه
شمااطيحن حبك يرفعني للدرب الصح اترجعني
اشكر فضلك يابواليمه
★★★★★
دومك رايد رفعة راسي ومااهتم الدهري القاسي
حبك دوم امعطر انفاسي وشاغل كل ذرات احساسي
ايشكل حبك ميَّة معنه ناتج حبك هوه الجنه
بكل شده انخاك وتسمعني للدرب الصح اترجعني
أشكر فضلك يابواليمه
الشاعر حسن لعيبي الحريشاوي
https://www.tgoop.com/pagy007
BY قناة بستان الألحان الحسينية
Share with your friend now:
tgoop.com/alaa66klf/37056