tgoop.com/alaa66klf/36934
Last Update:
شد حيلك الساعه گضت وتشوف الامصاب
وتعاين__ ابعينك علي لچماتي بالباب
***
ما اريد لو طر الفجر بس انت كدامي
والدمعه بعيونك بدت لوسولف احلامي
مستغربه منك علي اشكد الحزن ابدموعك
وانت الأسد تكسر ظهر تحنيهن انت اظلوعك
والدهر ياخذ زهرتك طفوها ليش اشموعك
بس الدمع يم الكبر اشعر علي موضوعك
مجبور تصبر ياعلي هونك يبو اتراب
وتعاين ابعينك علي لچماتي بالباب
***
بعيونك الدنيا اصبحت متكدره بدوني
أسأل ..عليك واطمئن لو تسأل شلوني
ماتنشف ادموعي ابد والسطره لسه بعيني
ضميته جرحي ياعلي بس الظلع ياذيني
كلشي انتهه وراح العمر وانه بزهور اسنيني
وبروحي فارگتك علي وسط الحد تلگيني
كل الشمل هسه انتهه عافوني الاحباب
وتعاين ابعينك علي لچماتي بالباب
***
فدوه يعافيتي علي كلشي انت دنياي
ماريد بيتي بلا علي كون انت وياي
اتوچه من ثكل الهضم ياعلي انده وينك
مادير بس طارف نظر دمعاتي جرح اسنينك
خافن يأذيك الحچي والدمعه تجري بعينك
تتگوه ماتكدر علي وين ام حسن بونينك
بدموعي جاوبتك علي معروفه الاسباب
وتعاين بعينك علي لچماتي بالباب
*****
اتنفس انفاسك علي بجروح الاحزان
يم راسي اريدك ياعلي تقرالي قرآن
هاي اعله فاطمتك علي وجهك يغير الوانه
عالوجنه تارك بس دمع يشرح مأسي احزانه
تتمدد بطولي علي جرحك صعب نسيانه
جرحك كبر يا ابا الحسن والفرگه بس عنوانه
مانامت اعيونك ابد حتى الكلب شاب
وتعاين بعينك علي لچماتي بالباب
*****
ياوسفه فارگنه الزمن بس انت روحي
وسط الحد وندب علي انه وجروحي
كاعد جرح یم الگبر ارجع علي ياروحي
زينب تون من الهجر اشچم طعنه بيها اجروحي
ودعته عمري من وكت اثمنطعش بس نوحي
كل خطوه ملچوم الظلع طيحت بيت اصروحي
والدهر فاتح لچمته عذبني الصواب
وتعاين بعينك علي لچماتي بالباب
**
كل بالي يم زينب علي ظلت يتيمه
باجر وراهه الطف دمع نار وهضيمه
يابعد روحي وكل هلي والدنيا تحچي اهمومي
روحك علي بروحي صرت والليل عد انجومي
والعشره راحت من وكت والهجر دمع ارسومي
عندك وصيتي ياعلي يم كبري تخفي اعلومي
وسدني بچفوفك علي وتهيل التراب
وتعاين ابعينك علي لچماتي بالباب
***
تمت بعون الله
خادمكم..... يوسف الفتلاوي
https://www.tgoop.com/pagy007
BY قناة بستان الألحان الحسينية
Share with your friend now:
tgoop.com/alaa66klf/36934