tgoop.com/alaa66klf/36697
Last Update:
لزيارة الاربعين والمشايه
لهذا اليوم ناذر روحي وسنيني
اجيت باربعينك دمعتي بعيني
★★★★★★
عفت روحي واهلها عفت دنياي كلها
يبوالسجاد رايد كون تقبلني
أبحسرتي ونار گلبي تصاحبني وي دربي
الناعي ابكربله لمن يذكرّني
شكثر زينب هظمها المحروگه خيمها
وحال اطفال مرعوبين يهظمني
أگبالي اصير الطفوف علي السجاد مچتوف
وسفه امگيدينه والظهرمحني
مصيبه احزانها تجري بشراييني
اجيت باربعينك دمعتي بعيني
★★★★★★
بعد ماظلت اخيام زينب مشت للشام
أتصبراطفال تمشي الدرب مرعوبه
اذكر هظم العيال ابد مامثله كل حال
اطفال بلاغطه وظعون مسلوبه
غربة اوظلمة الليل عليهم جالت الخيل
عيال بياذنب للگوم مطلوبه
زينب ظلت اليوم بحرگه وگلب ملچوم
هاذي زينب الكل وكت مهيوبه
تجرح هلصور گلبي وتچويّني
اجيت باربعينك دمعتي بعيني
★★★★★★
امشي ودمعه بالعين تسولف قصة حسين
مية سالفه بكل گطره بدموعي
اودع الراحه توديع ماعندي مواضيع
بس انته يبو السجاد موضوعي
اجيت اليوم مشاي ليل الحزن وياي
عمر الليل اطول من ضوه شموعي
جيش وخيل وسيوف گبالي اصير الطفوف
امشي الكربله والناربظلوعي
وخيالي يروح يم نحرك يوديني
اجيت باربعينك دمعتي بعيني
★★★★★★
امشي بگلب مهموم ماشايف طعم نوم
من نار الخيم مصدرها نيراني
على المطعون برماح وگمر يم النهرطاح
اظل ابلوعتي ما افارگ احزاني
لجل أعيون الحسين الناذر عمره للدين
عفت كل الاهل وتركت خلاّني
ويبوالسجاد ناديت بدربك لمن امشيت
شمقدم الك بيش افتخر اني
خادم ريت الك للدوم خليني
اجيت باربعينك دمعتي بعيني
★★★★★★
شوفيلك يوفاي ذبيح الماشرب ماي
وانا اهل المواكب ماي يسگوني
ثوبك ليش مسلوب وظعنك راح منهوب
وانا المهيوب خدامك يخدموني
اعيال الظاعت بليل منهم شافت الويل
شلون اگعد بموكب واطبگ جفوني
الضريحك انا يايوم شوكت اوصل يمظلوم
اريد ابراحتي من ابچي يخلوني
وين الگه عمر للنوح يكفيني
اجيت باربعينك دمعتي بعيني
الشاعر حسن لعيبي الحريشاوي
https://www.tgoop.com/alaa66klf
BY قناة بستان الألحان الحسينية
Share with your friend now:
tgoop.com/alaa66klf/36697