tgoop.com/alaa66klf/36681
Last Update:
#لمولاي الحسن كريم أل البيت عليهم السلام
ياكريم ألما يذكرك مو كريم
ما يهيم ألما بچالك ما يهيم
ومايعرف الحب ترى گلبه سقيم
يامولاي
يالحسن مديت أديه،، ياكريم أسقيني دمعه
أحن من أمي عليه،،، حاشا أحسانك تمنعه
عن گلب رايد وصالك واليطلبك ماترجعه
يالعطائك هائل ... أنه جيتك سائل
وأنته غامرني بعطائك وبرحمتك
طامع بأحسانك... بجاهك وسلطانك
نعمتي وخيري ووجودي من نعمتك
بالعلن ألهج بذكرك والخفاء
أنه بالشده أندبك والرخاء
أرزقني بس دموع تكفي الكربلاء
يامولاي
سيدي ارزقني محرم من نسيمك هبلي نفحه
كربله جرح المواسي وأنه گلبي هذا جرحه
شكثر متمني أزورك وگلبي يم گبرك أذبحه
ياكريم الساده... أنت تنطي أزياده
وأنته حتى الما تعرفه هم تكرمه
سفرتك ممدوده ..أبد مامحدوده
وهوا بس الي خدمكم ترفع أسمه
لجل أخوك حسين شتعزب ونين
لو دمع تنطي بثواب أم البنبن
عالگلوب العاشگه تنثر حنين
يامولاي
أبد لا ما ساد بابه أمضيفك المهيوب موكب
وأنته ابو الموكب وشيخه بدمعتك دومك معزب
ادلالك أتشيم اليخدم منها عطر التعزيه أيهب
معزب بعريسك... واجبي تقديسك
بالطفوف أنطيت شاب وعاف عرسه
قدمت قربانك... ياچبير أخوانك
أول معزب وليدك ينطي نفسه
يالحسن مديت چفي أنطيني حيل
أحـزام حزمني المحرم بالعويل
مو عبدكم أنه أذا أنكر جميل
يامولاي
بهل زمان الراد ينصر نصرته موقفها مدمع
من يهل شهر المصيبه واعيه دلالي يسمع
أدخيل خليني أواسي وللغريب بخدمتي أفزع
نصرتي بدمعاتي ...وخدمتي وأهاتي
زحمه من خيام زينب گلبي يبرد
ملجئي بالخدمه...انطيني حيل وهمه
خادم الخدام أخيك رايد أنعد
✍️حسين حمدان الدلفي
https://www.tgoop.com/alaa66klf
BY قناة بستان الألحان الحسينية
Share with your friend now:
tgoop.com/alaa66klf/36681