tgoop.com/alaa66klf/36544
Last Update:
اعيوني من كد الدمع ..راحت
والناكه من كثر التعب.. طاحت
درب السبي بطول الرمح .. لا ليلي ليل ولا صبح
***
نتشابه بكل الصور .. ضهرك مثل ضهري انكسر
للشاطي من عمرك خلص .. كل خطوه بثنعش شهر
من طاح اخوي عله النهر ..رديت الي محني الضهر
الشيب بلحيتك غيرك .. كل شيبه كاتلها القهر
اشوف .. كل خطوه من عمرك سنه
اشوف .. ضهرك يبو اليمه انحنه
اشوف .. ديرت حزن كلبك بنه .. اشوف
وناتك بحسره والم ..رايح
حيلك بعد حيلي انهدم .. طايح
يالشايل بكلبك جرح .. لا ليلي ليل ولا صبح
*
شفتك شمس كاسر ضوه .. مخنوك ريتي بلا هوه
شفتك نهر ميت عطش .. خدك بالرمال انجوه
وي الكمر راسك سوه .. مافاركك راعي الوه
وعينه الكعد بيها السهم .. ما مر عله اجروحي الدوه
اروح .. ويندهن تل الزينبي
اروح .. يازينب ودرب السبي
اروح.. لون الدمه بولن العبي
سوط الشمر لاح المت .. خويه
صاحت رقيه من الألم .. بويه
فوك الجرح ينزل ملح .. لا ليلي ليل ولا صبح
****
عالتل اعاين مصرعك .. وحافر خيول اتكطعك
كامت تدوس عله الصدر .. بنص المعاره توزعك
جروح اليتامه توجعك .. تناديني عالتل اسمعك
شبيدي ودنه السلاب الك ..رد خويه كاطع اصبعك
غريب .. والحافر بجسمك سحك
غريب.. وصدرك على ضهرك طبك
غريب..ودلالي بالحسره احترك
ياخيل ارحمنه صحت .. غارت
كلهن على جسمك شفت .. دارت
داسن على صدر السمح .. لا ليلي ليل ولا صبح
***
يالوعه من جرحك تحس ..مو وجهك تغيره الشمس
يالتارس الدنيه ضوه .. من تالي حافر تنرفس
بالرمح راسك ينغرس..وانطيت للدنيه درس
عفت النهر عطشان الك .. جربه عله جفك يتنرس
تموت .. والشاطي بجفوفك لزم
تموت .. من العطشان يابو الشيم
تموت ..وعينك تصد عله الخيم
يمفطره اشفافك متت .. ضامي
وعفتك يخوي عله الرمل .. دامي
ياخويه من شفت الذبح .. لا ليلي ليل ولا صبح
****
انه الاميره عله الهزل .. نادون وين ابو الفضل
بس عيني تربي عله النهر .. والحرك تكتلني كتل
شماتي مني ماتمل .. كل لحضه عنك انسأل
ترد الينزل دمعتي .. ياخويه لو بعدك عدل
انوح .. من يلجم السوط المتن
انزح .. عالمشرعه طاح اليحن
انوح .. ابيض غده رمش الجفن
عكب الكمر مسبيه ارد ..واسفه
ذاك العصر عيني النهر .. جفه
واخيالي هسه يلمح .. لا ليلي ليل ولا صبح
****
تمت
احمد الخفاجي
https://www.tgoop.com/pagy007
BY قناة بستان الألحان الحسينية
Share with your friend now:
tgoop.com/alaa66klf/36544