tgoop.com/alaa66klf/36513
Last Update:
محرم 🔻
خويه خويه 💔
ليلة الوحشه
ـــــــــــــــــــــــ••❃••ـــــــــــــــــــــــ
خويه خويه يبن ابويه
عذبوني ...... عذبوني
عيوني ماظل بيها ماي
صدري مخنوگ بهـواي
وينك انتَ...وينك انتَ
وينك انتَ
ـــــــــــــــــــــــ••❃••ـــــــــــــــــــــــ
حيلي بايد ياكفيل مثل ماي وگمت اسيل
اظلم بعينـي النـهار ودنيتـي بعيوني ليل
تحترگ شفت الخيام وانـه محتاره بعليل
بالحرم ما ادري احير مدري بالايتام اشيل
بيه حيره ..شگد چبيره
حيروني ....حيروني
تركـض اطـفالـك وراي
عيوني ماظل بيها ماي
وينك انتَ...وينك انتَ
وينك انتَ
ـــــــــــــــــــــــ••❃••ـــــــــــــــــــــــ
خويه شيفيد العتاب رايـح انته ومـاترد
ارد اسولفلك كـلام وادري مـنك ماكو رد
ياحنين انه سبيت وانت واعدني وبوعد
گتلي لو واحد اچـاچ چفـي يفزعلچ يهـد
ياكفـيلي ...ماتجيـلي
يسروني ... يسروني
يـمتـه ترجـع يـا غـلاي
عيوني ماظل بيها ماي
وينك انتَ...وينك انتَ
وينك انتَ
ـــــــــــــــــــــــ••❃••ـــــــــــــــــــــــ
چني اشوفنـك تلـوج مـگطع ونايـم بقيت
صاحت جروحي وراك انه ياخويه نسبيت
ارجع ارجع گمت اصيح وانت ليه مااجيت
وَنتّك تشرحلي حال وادري النه مـا نسيت
شنهو عذرچ..صبي دمعچ
ياعيوني ...... ياعيوني
ردت اشـوفـك يامـناي
عيوني ماظل بيها ماي
وينك انتَ...وينك انتَ
وينك انتَ
ـــــــــــــــــــــــ••❃••ـــــــــــــــــــــــ
وين اشوفك گلي وين گلبي ملهوف اعتناك
اعتذرلك ما اجيت طيفي باحلامك اجاك
خويـه گتـلـي لاتـجيـن انـه ياخـويه فداك
تدري مجـبوره بقيت والسـتر عنـدي بغلاك
ستري غالي...تدري حالي
تعبوني ..... تعبوني
ابـقـه شـاهينـه بسماي
عيوني ماظل بيها ماي
وينك انتَ...وينك انتَ
وينك انتَ
ـــــــــــــــــــــــ••❃••ـــــــــــــــــــــــ
اسمحلي ياخويه بكلام راح اسولف بالعذاب
خضّر بوجناتي ليل بعيني ظلمه مـن التراب
البعـد ماخله حيـل روحي مـاتت گلبـي ذاب
والعطش يرسملي مـاي اركـض ويطلع سراب
عيوني شافت... روحي خافت
خوفوني .... خوفوني
ينصبغ جـدمـي بدماي
عيوني ماظل بيها ماي
وينك انتَ...وينك انت
وينك انتَ
ـــــــــــــــــــــــ••❃••ـــــــــــــــــــــــ
انت كافل ادري بيك گـدها مـاتخلف كـلام
ادري گطعوهن اديك ونايمه بصدرك سهام
لا تجيني ولا اجيـك ننـتظـر جـيت الظلام
حته اروح وامشي ليك واخذ وياي الخيام
بروحي خيمه...شكد هضيمه
يحرگوني .... يحرگوني
ناري مشتـعلـه وضماي
عيوني ماظل بيها ماي
وينك انتَ...وينك انتَ
وينك انتَ
ـــــــــــــــــــــــ••❃••ـــــــــــــــــــــــ
🖊️كلمات
عباس فاضل الشمري
https://www.tgoop.com/alaa66klf
BY قناة بستان الألحان الحسينية
Share with your friend now:
tgoop.com/alaa66klf/36513