tgoop.com/alaa66klf/36445
Last Update:
( إعدلو اصفوفكم)
ابو فاضل صاح إعدلو اصفوفكم
لا گوني ملگه لا تميلو اوجوهكم
إبسيفي اطشرها والمها اجموعكم
سيف الله واحسبه وبيد سبع الگنطره
اتزلزلت بيهم الگاع وللذبح لزمو سره
بين يسراه ويمينه الگوم كلها اميسره
الحرب لو نشبت اكيد انمحت عنها المغفره
اشما كثر عددكم
ابسيفي والله اذلكم
إبألم وحسرات شوف اعيونكم
زينب تَعاين للطف وٱتشوف راية عباس
بس هيَّ ظلت عاليه وطاحت اعلام الناس
اتگول حياك الله ياخوي يابو النوماس
ادري بيك انت البطل وبيك رَفعت الراس
ادعيلك يبو الفضل
خيمه فوگانه تظل
محروسه وهيوبه بيك ابيوتكم
اتجه صوب المشرعه وألگاهه مزدحمه اجيوش
حلف إبأسم العقيله اليوم ابدد هل وحوش
والعزه ايغطي الكوفه واترس شوارعها نعوش
ولو ابو السجاد يسمح حتى ادفنها العروش
اليوم آخذ الماي
غصبن على كل إعداي
وٱرد اشوف اشلون فعل اسيوفكم
گال بسم الله وگصدهم الگمر
وعزريل حط ابسيفه ارواح البشر
الطاح طاح والشرد من خوفه عثر
زاحهم صفحه ونزل شاطي النهر
عدوانه همه اشهود
وترس جوده ابزود
إتعَطشون اخوي وهذا غم مطلوبكم
عباس يا مكثر وفاه لٱجل امامه ودينه
عطشان چان وما شرب الماي گبل احسينه
برماح وسهام وحجر من بُعد رامينه
سهم طاح ابجربته وسهم طاح ابعينه
گطعو ايمينه وشماله
ومن هوه محد تَچاله
حسين گال لزينب يختي طاح اعمودكم
ابو الاكبر مشه للحومه وگعد يم الكفيل
شاف حاله اشلون حال وانمرد منه الدليل
شال راسه ابحجره حطه والدمع منه يسيل
عباس من نومه انتبه گال اشم عطر الخليل
خويه خلني ابگاعي
ارجوك لحالي اتراعي
شنهي عذري للعقيله وللطفل محبوبكم
رد ردت المغلوب استنفذت منه الحيله
راح منه احزام ظهره اتمنى واحد يتچيله
فات للخيمه وشلع عامودها رساله وصلت للعقيله
صرخت وصاحت يخويه هل ظعن ياهو كفيله
ياهو يعدل ميلته
اسمك يخويه هيبته
عفتوني بس روحي لا متعوفكم
( جمعه الديلمي)
https://www.tgoop.com/pagy007
BY قناة بستان الألحان الحسينية
Share with your friend now:
tgoop.com/alaa66klf/36445