tgoop.com/ahmed_alziwar2/66965
Last Update:
#قصائد__ فاطمه الزهراء_♥ _
#مـۄسسـﮫ_مــﻥــبـريۄن_للالـﺢــان
الناشر.احمد.الـــزوار ..
ــــــــــــــــــــــــــــــــــــــــــــــــــــــــ
•بأيّ ذنبٍ فاطِمة خـدها لُـطم 💔
ــــــــــــــــــــــــــــــــــــــــــــــــــــــــ
قصيدة رئيسية بحق الزهراء عن الامام علي عليهما السلام
حسرتي عليچ چبــيرة حسرتي عليچ
حسرتي كون الاخيرة حسرتي عليچ
انتي روحي ومهجتي ظلمة بعدچ دنيتي
------------------------------------------------------
حسرة كلش مؤلمة چنت اصد لفاطمة
تخفي اللآلام
اسمع آه بكل نفــس تــلچم بيها احــــــس
ليلي ما انام
عاشت ابأصعب وضع من اثر كسر الضلع
ابأخر ايام
عني شالت بالعجل بسرعة وافاها الاجل
وصارت احلام
عمري وياچ دفنته عمري وياچ
ليلي بعدچ سهرته عمري وياچ
صعبة صارت حالتي ظلمة بعدچ دنيتي
------------------------------------------------
لفاطمة حزني دهر وكَلبي بالفركَة انفطر
وتدمع العين
وياچ كل لحظة عمر وماكو لفراكَچ صبر
يم الحسين
يم حسن كلبي انكسر ودمعي طوفان انفجر
بخدي نهرين
الحسرة بالحسرة تجر يعصرن بروحي عصر
لا ترحلين
رحتي لاوين يزهـــــرة رحتي لاوين
حيدر عليچ شيصبرة رحتي لاوين
تجري لجلچ دمعتي ظلمة بعدچ دنيتي
----------------------------------------------------------
اكَعد وابچي واحن ويمي اولادچ تون
دمعي سچاب
اصبح وامسي بدمع واذكر مصاب الضلع
وعصرة الباب
امسح بدم الطــــــــفل المحسن وعيني تهل
من المصاب
سمعي زينب تنتحب والحسن دامي الكَلب
حسينچ انصاب
ادمه العيون غيابچ ادمه العيون
آه يا لوعــــــة مصابچ ادمه العيون
وياچ ماتت فرحتي ظلمة بعدچ دنيتي
-----------------------------------------------------------
كون يرجعلي الامــــــر يمچ احفرلي كبر
وانسه الهموم
يا حزن فكَدچ صعب لو ردت دارچ اطب
وشفت الهدوم
روحي بعدچ تحتضر وطيفچ كَبالي يمر
ابالي مرسوم
ذكرياتچ كــــل كتــــــــــــر وبعدچ اشمرة الصبر
وكَلبي مالوم
فكَد الاحباب هظمني فكَد الاحباب
بأم حسن من فجعنـي فكَد الاحباب
ريت يمــــــــــچ دفنتــــــي ظلمة بعدچ دنيتي
------------------------------------------------
موتــــــچ بكَلبــــي جــــــــرح يلي مثلچ مايصح
بعدچ انسان
يم حسن روحي بسجن بابة حسرات وحزن
وهمي سجان
سافــــــر وياچ الفـــــــــــــرح دمعي يازهرة انفضح
للخلكَ بــــــــان
آنه عنــــــــــــوان الصــــــــبر بالمصايب من تمــــــــر
وكل الاحزان
اجزع عليچ يبــــــــــــــظعة اجزع عليچ
عني بُعدچ شيــــــجرعة اجزع عليچ
دوم اسمعچ ونتي ظلمة بعدچ دنيتي
------------------------------------------------
مصيبتچ ما تنسه انتي ياخير النسه
عايشة وياي
خلف فراكَچ الــــــــم بكَلبي وآهات وندم
وضايع دواي
شكَد تمنيت الممات انتي چنتيلي حياة
ماتصح هاي
خذتي يادنيا الخليل عفتي دمعاتي تسيل
آه يدنياي
البُعد طال علية البُعد طال
يوم الفراكَ منية البُعد طال
عني راحت جنتي ظلمة بعدچ دنيتي
------------------------------------------------
أسالكم الدعاء رائد الاسدي
▪️مؤسسة منبريون للالحان رقم 1
@ahmed_alziwar1
▪️مؤسسة منبريون لنشر القصائد 2
@ahmed_alziwar2
▪️مؤسسة منبريون للمقامات3
@ahmed_alziwar3
▪️مؤسسة منبريون للنعي4
@ahmed_alziwar55
(كروب مؤسسة منبريون)
الكروب الاول 👇
https://www.tgoop.com/+tVfRCNCfpmJlMGRi
الكروب الثاني 👇
https://www.tgoop.com/+tVGiZHdfNq81ZGYy
▪️ قناة اليوتيوب الرسمية رابط الاشتراك
https://youtube.com/channel/UCz03jT4unuka51X7foOyXcg
▪️قناة الحان الرادود احمد الزوار على اليوتيوب
https://youtube.com/channel/UCEa2AIfPlXlAHgT7b8hxpvA
BY 2.مؤسسة منبريون لنشر القصائد🧿

Share with your friend now:
tgoop.com/ahmed_alziwar2/66965