tgoop.com/Sudaniislam/19026
Last Update:
"لن ينتظرك أحد، وستفوتك الدنيا والآخرة معًا!"
- في تفسير الآية:
﴿عَلِمَتْ نَفْسٌ مَّا قَدَّمَتْ وَأَخَّرَتْ﴾.
قدمت = كل عمل قدمته النفس في الدنيا تراه حاضر في ذلك اليوم.
في معنى أخرت:
أي كل عمل أخرتهُ النفس فلم تعمله.
- في أخرّت وقفة طويلة جدًا جدًا..
واستاذ قصي جزاه الله خير ما قصّر بشرحها.
كم من صلاة أخرتها عن وقتها؟
كم من عمل صالح أيًا كان أجلتهُ وما
عملته؟
كم من تراكمات اتخاذلت واتكاسلت عن إنك تقوم وتنجزها؟
دا بذكرنا دايمًا بساعات الامتحان..
لمن المُراقب يقول انتهى الزمن..
أي إجابة ما كتبتها أو سؤال جاوبته غلط
أو سؤال ما جاوبته أصلاً فات عليك!
بالمقابل..
أي سؤال جاوبته صح تمامًا يبقى حتلقى
ثمرته في النهاية♥️.
- مشكلتنا هي التسويف والتأجيل
في كل شيء!
سواء أمور دنيا ولا آخرة!
ودي حاجة لو تعلمون عظيم أثرها
السيء للإنسان، في الدنيا الناس حتتقدم
عليك وتعبر في حياتها وإنت لسه
واقف في مكانك، مع إنك ممكن تكون
عندك إمكانيات كبيرة وشخص ممتاز لكن
بتأجل وتستمر في التأجيل لبكرة!
وكذلك في الآخرة..
الناس حتعبرُ وتتقدم بجبال من الحسنات
جزاء أعمالها الصالحة كبيرها وصغيرها
وإنت لسه واقف في مكانك، وهناك
الوقفة في مكانك عاقبتها فإما جنة أو نار والعياذ بالله!
- 5 أمور تعالج ليك مشكلة التسويف والتأجيل:
1- تربط الأعمال بهدف واضحة وغاية عظيمة:
بمعنى تستحضر في قلبك الآخرة وجزاء
الصالحين وهو الجنة، تخلي الحاجة
دي ما تفارق بالك لحظة، وإنك الجزاء دا ما ح تحصل عليه لو جيت بيدين خاليتين من الأعمال!
تبدأ تنتظم في صلاتك
تنتظم في وردك
تنتظم باذكارك
بفعل الخير كبيرًا كان أو صغيرًا.
- لمن يكون عندك هدف واضح في حياتك، وفي غاية إنت ساعي ليها من عملك أو شغلك دا، يبقى ما حتلقى أبدًا فرصة لأنك تسّوف وتأجل.
2- يكون عندك رفيق درب!
بطبيعتنا بنتشجع أكتر وبكون في زي
روح تنافس وحماس وتشجيع لمن يكون
معاك رفيق يشاركك نفس الهدف والغاية
العظيمة دي.♥️
3- تحاسب نفسك دايمًا!
الإنسان اللي ما بحاسب نفسه على كل
صغيرة وكبيرة بعلمها وبرجع لدفاتره
وقائمة مهماته ويشوف عملت شنو وما عملت شنو هو اللي بكون ماشي ساي بدون اي هدف أو دليل وهو اللي اول خياراته التسويف.
4- ما تختار إلا ما تحتاجه!
بمعنى: تلقى الواحد يأخذه حماس البداية
ويشارك في كم حاجة فعاليات أو نشاطات ويكون عنده يعني كمية من الالتزامات تفوق قدرته أحيانًا فيبدأ يسّوف ويأجل، أو حتى لو ما أجّل ما بنجز شغله على أكمل وجه.
- خلي تركيزك دايمًا في حاجة واحدة
أو اثنين بالكثير..
خلصتهم ممكن تمشي للي بعدهم وهكذا.
5- ما تكون متاح لكل شيء!
دي تقريبًا عكس النقطة اللي فاتت..
تكون شخص يُقلد ما يراه، وين ما الناس اتجهت مشيت معاهم بدون ما تكون محتاج للحاجة دي وبدون ما يكون عندك هدف معين.
- غدًا..
التي توعدُ نفسك بها هي جزءٌ من عمرك يمضي، بلا رجعة، لا تُسرف في ثروتك من الوقت المتاح بين يديك، يومًا ما، ستكون أمنيتك أن تعطى ولو دقيقةً من ذلك العمر المُهدر، لعلك تعمل فيها صالحًا، فلا تتحقق الأماني يوم حسابك."♥️
#زكية_عاطف
BY خطوات للأجُر🌸.))
Share with your friend now:
tgoop.com/Sudaniislam/19026