tgoop.com/SDAMALUAILY/163
Last Update:
ياصاحبي ون حصل تقصير ناتي طراح
فيما بدر من جوانبنا باخذ وعطا
مشاغل الوقت تاخذنا بليل وصباح
فالوقت قاسي وماشي بالدروب الخطا
لامن لفتني حروفك خاطري بارتياح
ويدق هاجوس موالي وهو مبسطا
جواعد الراس والعينين فرش وسناح
فقدرك بها يارفيقي معتلي ماوطا
ونفاخر الناس والعربان بك بالمداح
يامن على الجود مداته لها مربطا
سلام يوصل جنابك عد براق لاح
وانشت مزونه وجرد العود منه شطا
القلب صافي ونبعه من عذايب قراح
من يشرب الهمج يصبح بالمسار الخطا
والشبح عالي وله مده تفوق الجناح
ياصاحبي ذا كلام الصدق بامر البطا
فاكثر الناس في ذا الوقت ماهم صحاح
كلن متوه علا فكره وهو محبطا
ياوجد قلبي وجود الي سهر للصباح
ويرومها طول ليله وكنه امجنطا
يذكر الوقت لي عنه توكل وراح
من بعد ماكان بالقمه ومنها اسقطا
كَلَّمَـےـاتِـ .. صدام الوايلي
https://www.tgoop.com/SDAMALUAILY
BY الشاعر صدام الوايلي
Share with your friend now:
tgoop.com/SDAMALUAILY/163