tgoop.com/RewayatNeedoo/6799
Last Update:
كانت مشغولة أو بالأحرى ماخدة الحفلة دي للشباب ومُتدسية مني عارفاها متحسسة شديد الفترة دي وما عايزة تتذكر إني ح أمشي أسيب ليها البيت بس أنا حاسة بيها شديد ومتفهمة شعورا ما هو أنا برضو بحتاج ليها بقدر حاجتا لي..من أسي بديت أشتاق لتفاصيلي معاها.
مشيت حضنتها وفعلًا بكت بس ننا قدرت تنقذ الموقف.
بعدها طلعت للبنات برة..وجود وِعاد وأسما وننا ونادين جنبي كفيل يحسسني إني إمتلكت الدنيا وعمري ما حسيت إنو عدم وجود صحبات كُتار ممكن يعمل لي مُشكلة مبسوطة جدًا بالشوية العندي ♡
إتبسطنا للأخر وحسيت إن الحياة بجد ساعات كتيرة بتبتسم لينا وتهدينا لحظات حلوة..حلوة شديد شبه كريم وصوته وعيونه وضحكته وكل لحظة قضيتا معاه بداية من أيام مُراقبتي ليه للحظات إعترافه..وأيام خطوبتنا وكيف قدر يخليني أسعد وحدة بعد عرفته ♡
________
"لا أستطيع التصالح مع فكرة أن يُهْدَر الصباح في الوظيفة وتأمين الرزق. أقترح أن يكون هناك صباحان في كل يوم. صباح للوظيفة والسعي في الأرض، وصباح آخر للاستخدام الشخصي. أيضًا حبذا لو وفّرت التكنولوجيا خاصيّة تُمَكّنك من تحديد الأشخاص الذين تريدهم أن ينتقوا معك، إلى صباحك الآخر ))
"مكالمة فيديو واردة من خطيبة كريم الزمراوي♡"
فتحت الخط وبقيت بس بعاين ليها..كانت حلوة شديد زي ما عودتني وأكتر..معقولة ده أخر يوم أحس بشعور إني ما عايز أمسك تلفوني تاني..لأني في الأصل بمسكو عشان أشوف صورها أو أكلمها أو أكتب ليها..اليوم ح أتخلى عن تلفوني عشان هي ح تكون معاي دايماً.
_ياخي ده صباح الخير الجد جد..كل الصباحات القبلهُ ما كانت صباح.
_الحمد لله ربنا رزقني زوج حناك.!
_إتلهي ياخ..مُتصلة مالك طيب..مش عشان حنكي ده؟
_لا مُتصلة أقول ليك ده أخر يوم ح تشوفني من ورا الشاشات..كريم جاهز تشوفني منكوشة؟
_ااا
_جاهز تسمع صوتي الما حلو دا وأنا بغني؟
_دقيقة..
_مُستعد تتشارك معاي قُمصانك ..؟
_أوعى إلا دي.
_حتى لو ما جاهز ح تشوفني..ده أنت ربنا يعينك بس.
_بتخوفيني يا نود..ده بدل ما توعديني بأحلى أيام لي معاك؟؟
_أحلى أيام شنو يا ولدنا..أنا ح أطلع فيك غضب كل السنين..أصبر بس أصلو الجاييك ما هين
_نحنا على البر...الحمد لله لسة في فرصة أخلع.
_ما بتعملها يا زمراوي ما بتعملها.
_أكتر شي عاجبني إنك واثقة وللأسف ثقتك في محلها..جاهز لكل أشكال العذاب..المهم إنها منك
_يا ولد يا خطير..لو كده صباح الخير♡
_ح تعملي شنو اليوم ..وطالعة متين للكوافير وبالله أجي ألقاك جاهزة وحركات أبوسك في راسك قدام الناس وأحضنك العوارة دي أعفيني منها.
_دي عوارة فعلاً ولو عملتها ح أنتحر بيك.
_هو مفترض نعمل حاجه عشان ما نحس نفسنا مغصوبين على بعض؟
_أوريك فكرة..!؟
_قولي..ابهريني يا ست نُود.
_سلم علي في يدي بس.
_ياخ ود عمك أنا..لا يدك لا رجلك...بتصرف براي شكرًا لأفكارك.
_ح تعمل شنو عشان ما اتفاجأ.
_لا أنا عاوزك تتفاجئي♡
_طيب يلا قوم وشوف وراك شنو.
_شوفي المسج ده بس وأقفلي
_أوكي.
"رأيتكِ واقفة في آخر الكون ليس بعدك أحد، حتى إذا أتيتك ونظرت خلفي لم أجد أحدًا، فأدركت أن الذي فاتني لم يكن إلا فراغًا، وأن ما بعدك ليس شيئًا، فأقمت فيك وعندك كل شيء، وفهمت لأول مرة كيف يرى المرء في الكون شخصًا واحدًا، ما إن يصل إليه حتى يرى في شخصه الواحد الكون كله."
ردت علي بـ_يوسف الدموكي حبيبي وشرياني♡
رديت بزعل_مٌرسلها ليك هو مش؟؟
ضِحكت_والله حلوة منك حلااا..أحييينا بس.
_ما تتكلمي معاي..مُتخاصمين لما نعقد.
_أوعك تتصل لي تبارك..شفت ما بحب العوارة والدموع والدراما دي.
_ياخ أمشي ياخ.
قفلت منها وأنا مُبتسم..في الحقيقة كل ال نُود قالت عنهُ عوارة هي نفسها يحصل معاها...بتقول الحاجات اللي نفسها تتعمل ليها وبتعمل ما عاوزة...!
هي نفسها اتصل ليها وأبارك♡ ونفسها أمسك يدها وأضمها لأول مرة وأعبر ليها عن قدر شنو اللحظه دي بتهمني وكنت بستناها...هي نفسها نجتمع أكتر مني♡
______
مكالمة من "عزيزُ قلبي❤️🐣"
_ننا عزيزك بِتصل.
_جاية أهو.
ملامح ننا بتتغير 180° لما نجيب سيرة عزيز وحقيقي بحسها مبسوطة كدا من جوة لمُجرد ذكر اسمه..دخلت الحمام وسبتها بتتكلم.
دي اول مرة أبيت برة البيت أو بالأحرى بعيد عن عزيز من لما إبتدت قصتنا الحلوة..بتذكر أيام كُنت عروس رجعت بيتنا وعديت إسبوع من غير ما أكلمه غير لما هو يتصل بالصباح..بتذكر برضو ما قلت ليه راجعة إلا لما هو طلب مني..بس حاليًا أنا غبت عنه ليلة واحدة وحاساها عمر.
_صباح الخير.
_والله ما في اي صباح خير في الموضوع.
_ليه ليه؟
_من وين يجي خير وإنتِ ماف؟
_كلها ليلة وحدة؟
BY «عَلى الهَامِش!💛»
Share with your friend now:
tgoop.com/RewayatNeedoo/6799