tgoop.com/RewayatNeedoo/6780
Last Update:
قعدنا في الصالة.. قدامنا طوالي ناس ابه وورانا غرفتي فيها نادين وننا.. حسيت المكان بقى لي أضيق من أخلاقي.
_همس لي:
_مالك سمحة كدا الليلة؟
_رفعت راسي عاينت ليه وغلبني أرد حرفيًا ما قادرة أتكلم..بس ركزت إنه لابس القميص البحبه جدًا.
_أقعدي كدي.
_قعدت وقعد في الكنبة الجنب يدي اليمين طوالي..دي ما اول مرة كريم يجي البيت هو على طول بجينا ولا مرة إتوترت منه كدا أنا كل يومين بلاقيه وما حصل حسيت كدا..شكله فهم في حاجة غلط.
_عايني يا نُود لو سألوك قولي أوكيه بس من غير أي إعتراض.
_يسألوني شنو؟
_أبوي قاعد برة مع أبوك وبما إنهم إتفقوا وشكلهم هيحددوا العرس عشان أبي راجع فما تعترضي على المدة أو أي حاجة بليز خلي الموضوع دا يتم سريع ونخلص.
_أبوك وافق يعني؟
_شكله كدا أنا بوريك عشان خايفك تقولي ما جاهزة والكلام الما مهم دا.
_طيب.
_قلتي طيب؟
_أي يا كريم أنا برضو نفسي نخلص.
_يارب الثبات من عندك.
_خلاص أمشي أسي يقولوا عننا شنو.
_عملنا شي غلط؟
_ما وقتك أمشي.
طلع قدامي وأنا جيت وراه عشان أسلم على أبوه..لحظتا حسيت الفستان كبير ونفسي كاتم وشعور كدا الله لا عاده لي..!
لما وصلت برة في السرير المُقاصدني طوالي شُفت أبوه رغم إني شُفته مرة واحدة في ستوري وِعاد بس حسيت نفسي بعرفه لما قربت أسلم عليه وقف على حيله.
_إنتِ مُش نفسها اللي..
_عمو إنت..
_شوف الدنيا دي ضيقة كيف..مد يده يسلم علي..!
_سلمت عليه وقعد يحكي ليهم إتلاقينا وين وكيف.
_ما كُنت متخيلاه أبو كريم خالص نسبة للصورة اللي ماخداها عنه شخص صارم وصعب وحاجات تانية كتيرة..بس طلع عمو لطيف بجد حتى ضحك علي وإعتذر إنه ما بعرفني ودي حاجة ما كويسة مفروض يكون عندو خلفية عني.
بعدها حسيت بالراحة.
كيف كلمة واحدة لطيفة قادرة تزح عننا أثقال وهموم كتيرة..!
بعد حكاية نص ساعة ونسة ختانا في الأمر الواقع وبصريح العبارة قال لينا:
_أنا راجع بعد 24يوم بالضبط هتسون العرس وتخلوني أحضره ولا أفل؟
_كلهم ضحكو على لهجته وحتى هو بقى يضحك معانا_أنا عيوني مشت على كريم تلقائيًا من زمن طويل ما شُفته بضحك بالطريقة دي ♡
فحددوا العرس فعلًا في الوقت الضاغط دا..أنا أساسًا قدر ما حاولت أتحمس للفكرة دي فشلت..على طول كُنت بشوف إن دا موضوع بعيد خالص عكس كريم اللي ما يئس ولا لحظة وكل مرة بقول لي ربنا كريم علينا ♡
بابا وماما قدموهم برة وأنا حسيت نفسي إتجمدت في مكاني وجاني الإحساس الغبي بتاع أبكي وأخربي أم اللحظة الحلوة دي..بس ننا كانت جنبي وشادة على يدي قالت لي:
_مش قلت ليك.
_واااي يا ننا كريم طالع حلو بقميصه دا.
_الناس في شنو وإنتِ في شنو؟
_لا بجد أنا قلت ليه ما يلبس القميص دا رغم إني بحبه فيه.
_دي شنو المِحن دي؟
_إنتِ بس ما شايفاه بعيوني.
_أنا عيوني ما بتشوف غير عزيز.
_انا زعلانة منه ما جا خطوبتي التانية.
_كرر علي ما تزعلي لي منه والله مضغوط وحالته حالة.
_يا زولة لو مهتم كان جا.
_قال هيجيني نرجع سوا لأنو ما ينفع أرجع براي بعد الزمن دا.
_خلاص أرح جوة لما يجي.
دخلنا غيرتي ملابسي وبعدها ماما وبابا جو وسامعاهم بتناقشوا في الموضوع أنا وننا كنا بنتونس جوة ونادين شالت بتها ومشت غرفتا راجلا إتصل ليها.
بعد مسافة عزيز إتصل ليها وصفت ليه جا سلم على ناس البيت ماما نادتني نلم الحاجات لأنو المكان جايط من بين الحاجات كان في عِلب حلاوة وبارد قلت كريم لازم يعمل حركة حركتين تاعب نفسه ليه!
_ماما كانت مبسوطة لأنها كانت متوترة أكتر مني من عدم موافقة أبوه لكريم.
ضيفنا عزيز قعد شوية وإعتذر مننا إنه مُستعجل ولازم يرجعوا الزمن إتأخر قدمتهم برة وكالعادة لازم أشغلا ليه وإنو ما قاعدين يجونا وهو يحليله يشيل ويعتذر مني وأنا مستمتعة من منظر ننا وهي ما قادرة تقول حاجة.
_كويس بتلومي لي راجلي مش؟
_نسيبنا لازم نتعزز عليه شوية.
_حلو خلي كريم يجي جاهز لأنه كله هيرجع فيه تالت ومُتلت.
_أخصص عليك أسي كريم دا بجي من قلبك تلوميه.
_لا يعني عزيز شبه اللوم.
_بري حاشاه والله بشغلا ليه ساي.
وقتها عزيز ركب وسخن العربية وأنا ننا واقفين ما كملنا ونستنا..ما بحس إني بشبع منها حتى لو تفضل معاي العمر كله ♡
_تمام لما تصوا طمنيني عليك.
_طيب.
قفلت الباب ودخلت بابا ما سألني طبعًا رغم إنه صحبي شديد وعلى طول زمان لما كُنا في الثانوي بقعد يخطط معاي ويقول لي في عرسك هأسوي ليك وأعمل ليك وأوديك وأجيب ليك..بتذكر نادين كانت جادة كدا وممتحنة عملي السنة كلها بين كُتبا وحتى لما دخلت الجامعة بنشوفا يوم الجمعة في صينية الغدا كل الناس كانت متوقعة أعرس اول منها بي سبب إن ما في زول عارف إنها بتنا خالص فبنقعد أنا وبابا نحكي عن المناسبة الهتحصل في البيت.
_____
___
عند إيناس:
BY «عَلى الهَامِش!💛»
Share with your friend now:
tgoop.com/RewayatNeedoo/6780