tgoop.com/RewayatNeedoo/6741
Last Update:
_صبرًا يا رب.
_أمشي طيب.
_ما وش نعمة خالص.
_نعمة دي منو؟
_وحدة كدا بعرفا.
_أها تتهنوا.
_بتغيري؟
_بري الغيرة دي بتاعت العيال التوتو.
_طب دا منو القال:
"كل خوفي أن تحبك غيري"؟
_ستوري عجبني وختيته عادي يعني.
_لا جد الموضوع عادي؟
_كريم إنت ما جادي كيف يعني عادي؟
_طب قولي!
_أقول ليك قدر شنو الموضوع بوجع؟
ولا قدر شنو دا شعور سيء؟
_لا خلاص كفاية نكد..مافي أي وحدة هتعرف تحبني زيك أساسًا ♡
_وإنت هتعرف تحب وحدة غيري يعني؟
_بتعرفي الموت؟
-الله يرضى عليك بلاش السيرة دي بتوجع قلبي لما تقلب جد وتتكلم كدا.
_ما إنتِ اللي بتختي ستوريهات حزينة!
_خلاص ما قصدي شي عدم الموضوع بعمل أكتر من كدا.
_عمرك تاني ما تفكري كدا.
_حاضر حاضر.
_بحبك ♡
"سأعترف لك وبشكل أبدي لم يتمكن أحد
من لمس قلبي مثلما فعلت أنت ♡︎.))
__
"في الماضي"
_شوف البت دي شكلها جديدة هنا.
_ليها كم يوم من نزلت مع كلاس A.
_عجبتني ماشي أتعرف بيها.
_في اللحظة دي ما عرف يقول ليه شي فضل ساكت..وأساسًا هو ما إستنى رده إتحرك طوالي ومشى عليها..كان بعاين ليهم من بعيد وقف إتكلم معاها مسافة إتعدت الـ5دقايق بعدين أخد قلم منها وكتب شي على يده وجا راجع مبسوط..بدون ما يسأله قال ليه:
_البت بريئة شديد.
_وإنت ما هتستغلها صح؟
_يا فردة إنت معقد كدا ليه بتسمي اللحظات الحلوة إستغلال؟
_ما حلوة في حقك.
_سيبك من الموضوع دا أها الليلة الكاش صح؟
_إنت أخدت نصه مقدم.
_عاين للنص المليان.
_والنص الباقي هتدفع منه الإيجار والدين.
_ياخي نكدي أكتر من البنات.
_بوعيك بس.
_بتتجازف عندي بيعة لو تمت..
_ما حصل شفت ليك أي بيعة تمت إنت هتغرق يا نزار.
_أشتمني يلا.
_هههه الواحد ما يهظر معاك عمومًا أنا ممكن تسدد لي على راحتك.
_حبيبي والله..ما بنساك لو الشغلة ظبطت.
_الله يهديك يا زياد.
_بركاتك يا شيخ رحيم.
_إتريق كويس.
_ما تريقة والله بس فكك شوية ياخ.
_كويس..!
وقتها زياد ورحيم كانوا صُحبة شديد وشغالين في مركز بصمموا بوسترات وماسكين شغل الريسيبشن والتسجيل..!
لما اول مرة جات بت حلوة بريئة سجلت ونزلت عندهم رحيم من بعيد كان بعاين من غير ما يقول شي..بطبعه هادي ورزين وما بيتسرع..يمكن ضاعت منه حاجات كتيرة بسبب هدؤ بس أفضل بالف مرة من التسرع اللي بوقع في مشاكل.
زياد اول ما شاف وعاد عجبته حاول يتقرب منها ولقى حجة يتكلم معاها وياخد رقما..كواحد فيه مواصفات كتيرة بتخليه الخيار الاول لاي بنت تشوفه..وسيم..طويل..كاريزما..كلامه حلو..دمه خفيف..!
أخدت وأدت معاه وما هي إلاّ أيام وحصلت مشكلة مع صاحب المحل وساب الشغل وقتها جات وقفت قدام رحيم وسألته عنه..ما كان متوقع رد فعلها يكون كدا على غيابه بس هي عملت اللي قال عليه قلبها.
_زياد ساب الشغل هنا.
_اووف يعني ما هيرجع؟
_ما أعتقد والله لو في حاجة مهمة ممكن..
_لا ما مشكلة معاي رقمه هرسل ليه.
_طيب.
كسرة الخاطر بتجي لما نقول عادي..أوكيه..طيب..ماشي!
لو بس مرة إعترضنا وإتعلمنا نواجه كل شي بزعلنا خاطرنا ما كان إتكسر بس بنخاف نكسر خاطرهم.
____
_السلام عليكم.
_وعليكم السلام ..حمدلله ع السلامة.
_الله يسلمك طمنيني عليك؟
_بخير وعافية .. مالك ما كلمتنا إنك جاي؟
_قلت أفاجئكم.
_نودي هتفرح لما تجي..
_كالعادة طلعت!
_مشت لإيناس من رحلت ما مشت ليها.
_طيب خير أخد راحتي لما تجي.
_خلي عنك أنا هدخلهم إنت إرتاح.
_الله يقويكِ لي يا أم البنات.
___
_ننا قومي كفاياك!
_متين نمت أسي؟
_ليك ساعة!
_الحنة لسة عليها؟
_طلعيها لو زهجتي.
_لا هأصبر شوية..أمشي سخني القهوة جيبيها.
_ما نفسي ياخ.
_إنتِ مالك يا زولة؟
_مافي شي والله بس زهجانة ساي.
_كرر عليا.
_ننا هو أنا لو حسيت بإحساس بضايقني رغم إنو مافي زول زعلني بس حاسة إني زعلانة دا يبقى شنو؟
_تراكمات؟
_لا أنا بزعل اول باول ما قاعدة أخلي زعلي يتراكم.
_طيب ضغوطات؟
_ضغوطات شنو وأنا فاضية 4أيام في الاسبوع؟
_ضغوطات نفسية يا هبلة ما كل تعب لازم يكون جسدي.
_زي شنو؟
_مثلًا تفكيرك في الموضوع المعين اللي عاملة فيها ما قاعدة تفكري فيه وما عارفاني عارفاك.
_ااوووف تعبت والله وأنا عاملة فيها ما مركزة بس هو ليه أبوه ما بيرضى ويخلصنا؟
_حاسة بيك والله..حتى لو ما قلتي ♡
_أنا هموت لو..
_تفي من خشمك..ما هيحصل شي أساسًا مافي عرس من غير مشاكل.
_ما حمل بهدلة أنا.
_على أساس كريم يستاهل يتبهدل كدا.
_لو كان وراني من البداية دا كله ما حصل.
_ما كنتِ هتوافقي وما كنتوا سوا أسي.
_وما كنت إتعلقت بيه وما عارفة أعيش من غيره.
_أسي ما ضاع شي وإن شاءالله أبوك يجي ويقعدوا سوا وكل شي هيتحل وهشوفك أحلى عروس ♡
_يارب يارب.. أنا جُعت.
_إنتِ مشاعرك في معدتك صح؟
_عارفاني لما بتوتر ببقى عايزة اكل.
_الله يعينه كريم.
_جد والله تعبان شديد معاي ساعات بقول خلاص تاني ما هزودا عليه بس إتعودت أعمل شنو؟
_ما تعملي شي يا ستي يومي سوي لينا شي ناكله.
_عايزة تعملي شنو؟
_خشي المطبخ شوفي ممكن نعمل شنو.
_طيب دقيقة بس.
BY «عَلى الهَامِش!💛»
Share with your friend now:
tgoop.com/RewayatNeedoo/6741