tgoop.com/RewayatNeedoo/6733
Last Update:
-صباح الخير..!
_صباح النور.
_كيفك؟
_كوويسة.
_وأنا كويس الحمدلله.
_ربنا يديم.
_الزعل اللي بينا؟
_ما قصدي كدا بس إذا عايز اوكيه!
_أيوة غطسي حجرنا!
_أكتر من كدا؟
_إنتِ زعلانة مالك أسي؟
_بري ما زعلانة البزعلني شنو.
_يعني ما زعلانة عشان بلكتك؟
_خاااالص.
_قولي والله!
_ما بحلف بس البزعلني شنو من زول إختار بنفسه يقفل كل الأبواب البينا وهنت عليه؟
_طيب لو قال ليك إنه أبدًا ما هنتي عليه؟
_ليست الأفعال كالأقوال!
_يا عميييييقة.
_كنت ماسكة ضحكتي وأنا أصلًا طبيعي ببتسم وأنا بكلمه..فضلت ساكتة.
_نُوود!
_ها..
_قلتها ليك الف مرة أنا هضيع من غيرك وإذا بلكتك ما معناه هُنتِ عليّ.
_مافي تفسير غير كدا إنت أصلًا عملت فجوة في علاقتنا بدل ما تسمع مني إخترت تبعد!
_لو كان إتناقشنا كُنتِ هتلاقي تبرير تقوليه ووقتها ما كان مزاجي بسمح لي أسمع أي شي.
_وأسي؟
_أنا لسة زعلان وماخد موقف بس إتصلت أقول ليك:هلاقي عزيز وأشوف كيف هساعده وأبوي جاي بكرة.
_تمام ربنا يسهل ليك.
_اسمها لينا.
_ما مُتأكدة الصراحة.
_أفهم إنك قلبتي الطاولة وزعلتي؟
_شايف زعلي قلب طاولة؟
_أبدًا يا قلبي والله.
إبتسمت بعد إتأكدت إنه جد ما بيقصد وأنا أساسًا عارفة نفسي غلطانة وموقفه دا طبيعي.
_إنتِ معاي؟
_معاك..معاك.
_ما عايز غير كدا.
_ما تتلصق نحن متخاصمين.
_ههه..طيب خلينا متخاصمين كدا يمكن واحد فينا يشتاق للتاني ويعرف قيمته.
_وطبعًا الواحد دا إنت.
_عشان عارفة إني بحبك أكتر صح؟
_عكست الآية.
_عكست شنو؟
_ما بشرح ليك..عندي شغل وننا جات يلا باي.
_إنتبهي لنفسك.
_كويس.
_قولي لي ما بديتي تكتبي وواقفة كدا بتخلطي؟
_حصل.
_ملاحظة بقينا مستهترين بالشغل؟
_أيوة وهيتخصم من راتبنا لو ما كملنا العدد المطلوب.
_هتاخدي جهازك وتترزعي هناك وتكتبي وأنا هقعد هنا اكتب ما عايزة اسمع صوتك لحد ما نخلص.
_أوكيه عندي حاجات كتيرة حلوة حابة اكتب عنها.
_مثلًا؟
_أسمعي دي:
(نحن دائمًا بحاجةٍ لمن يأتي إلينا من تِلقاء
قلبهِ ))
_الود كريم فك البلوك ولا شنو؟
_هو أصلًا بلكني ساعتين ورجع فكاه.
_عارفة يا نُود كريم طلع يستاهل بكيك فيه لما كُنا برالمة ويستاهل كل المشاوير من كليتنا لكليته دا طلع يستاهل المحاضرات اللي ضاعت بسببه.
_طب والله حصل.
_أكتبي سيبي الفارغة.
____
_السلام عليكم.
_وعليكم السلام والرحمة.
_عزيز باشا طمني عليك الصحة فل؟
_زيما شايف أهو.
_الحمدلله.
_إنت الحاصل عليك شنو؟
_كله تمام..تشرب شنو؟
_قهوة سادة.
طلب من الويتر اتنين قهوة سادة ورجع يتكلم معاه عن صحته والشغل..عزيز كان مُختصر شديد في الرد عكس كريم اللي عايز يخلق جو للكلام والونسة لأنه سلفًا عنده فكرة عن وضع الشغل.
_طيب أنا جبتك عايز منك تستلم لي مشروع.
_بس أنا مضغوط وشغال.
_عارفك مضغوط والله بس دا مشروع ما ينفع أسلمه لأي زول عشان كدا إخترتك.
_وإنت ليه ما عايز تشتغل فيه؟مش برضك مهندس؟
_صحبك عنده تحضيرات وجوطة كتيرة ما هكون فاضي ليه!
_كريم مشروع كبير زي دا عايز عُمال يشتغلوا مع مهندس بيعرفوه ليه تختارني؟
_ما قصة ياخ انا المهندسين المعاي بشتغلوا مع أي مهندس ما عندهم مشكلة.
_برضه ما جاوبتني.
_طيب ما كُنت عايز اكلم زول بالموضوع بس هحكي ليك.
بدو يحكوا مع بعض وعزيز لسة مُصر على رأيه عايز يعرف كل حاجة وفي نفس الوقت جواه كبرياء مُخليه يرفض أي يد تتمد ليه في الوقت الحالي..حتى إيناس لما حاولت تتكلم معاه في الموضوع دا كان بطمنا وما مكلما عن خططه الجاية كان حاسس إن دي مشكلته هو وحلها مسؤوليته الكاملة.
__
في المطار:
المطار أكتر مكان متناقض إتوجد في سطح الكرة الأرضية بتلاقي فيه شخص حزين بودع أولاده وأسرته مضطر يبعد عنهم عشان يقدر يوفر ليهم حياة كريمة..
بتلاقي فيه أم بتبكي وتحضن ولدا بطريقة مثيرة للشفقة اللي هيا أنا مودعاك بس لسة عايزاك تفضل شوية.
بتلاقي شخص مريض وهلكان ما فاهم قدره سايقه لوين إذا هيرجع كويس ولا لا.
بتلاقي فيه اتنين متزوجين مسافرين وشايلين معاهم أحلام حلوة وبدايات جديدة.
بتلاقي أولاد مستنين أبوهم اللي راجع بعد طول غيبة وفراق دام سنين طويلة.
إلاّ هو عايش تناقض ما بتوصف مُستني من غير ما يعرف هو حاسس بشنو..إحساس مخلوط بشوية خوف وحُزن وذكريات قديمة صورتها طشاس طشاش.
_حمدلله على السلامة!
_أخده في حضنه وقال ليه:ما ودك تقول يابا؟
_إبتسم..!
#على_الهامش:
(لقد عشت معك شعور أول مرة من كل شيء وهذا يكفي لأتذكرك دائمًا.))
#نوودين
#ننس_تمدين
BY «عَلى الهَامِش!💛»
Share with your friend now:
tgoop.com/RewayatNeedoo/6733