tgoop.com/RewayatNeedoo/6727
Last Update:
_لا حول ولا قوة الا بالله..بس يا باش مهندس السوق اليومين دي كعب شديد والله وما هتلقى سعر كويس!
_ما مهم السعر عايز حاجة تضمن لي إيجار سنة لقدام يكون مُقدم في بيت أرضي.
_في بيوت بالسعر دا بس بعيدة شوية يعني حتات طرفية و..
_ما تتحسس يا أحمد نحن دفعة جامعة وإنت اكتر واحد عارف الظروف ما مُحتاج شرح!
_وعارفك كويس يا عزيز ما إنت اللي..
_الحياة كدا بتغيير أي عزيز ما بس أنا.
_واولادك؟
_ما كلمتها لسة والله وما عارف الهيحصل بس مُستعد لأي حاجة.
_خير إن شاءالله هرجع ليك بتلفون لو لقيت بيعة كويسة وبعدها هشوف ليك موضوع البيت!
_لا حاليًا البيت أهم شي عندي..أهم من البيعة حتى.
_طيب ربنا يسهل.
دور عربيته وباين عليه القلق في ملامحه فجأة كانه كبر عشر سنوات..!
غريب كيف المشاكل والهموم رغم إنها جزو من الحياة وسلفًا عارفينها بس كل مرة تباغتنا وتاخد شي مننا..ساعات تطفينا وساعات تانية تخلينا نخسر كل حاجة..!
____
في الشركة:
قبل ما يدخل مكتبه وقف عند السكرتيرة:
_يا ليم الإجتماع تبع التنفيذي قائم؟
_بدوه ابدر من وقته شوية.
_ليه ما أديتيني خبر بالموضوع؟
_دنقرت راسا..مستر جلال طلب مني ألغي حضورك.
_خير..وإجتماع الموقع "C" ؟
_قائم بس باش مُهندس عمار طالبك في نفس الوقت..قبل شوية رسل إيميل إنو عايزك الساعة 3 ودا وقت الإجتماع.
_همشي ليو أسي.
من الزعل العليه ما قدر يقول أي شي كل تفكيره كان..
معقولة الناس دي بتعاملك بحسابك اللي في البنك؟
بتحدد إذا هتكمل معاك في شغل أو لا بناء على مشروع لازم يكتمل في وقته؟
ما بيختوا أي عُذر ..!
ما بيعرفوا ظروف؟
طب وحياتك اللي حتتقلب رأسًا على عقب بين يوم وليلة؟
وأحلامك؟
لما وصل وقفت سكرتيرته:
_أخدمك بي شنو يا باش عزيز؟
_الوحيدة اللي لسة شايفاه مهندس في الشركة دي وختت ليه إعتبار.!
_عايز باش عمار في 5دقايق بس.
_إستنى أكلمه رفعت التلفون وإتكلمت معاه خلته يدخل..
___
_الو.
_فاضية تسمعيني
_مالك يا بت..صوتك ما عاجبني؟
_كريم..
_لسة ما رضى؟
_حظرني يا ننا.
_لا ما بيعملا.
_لا صدقي كله وارد.
_إتكلمتي معاه؟
_أيوة.
_عايني.. تعاليني في البيت نتفاهم.
_ما نفسي اطلع ياخ.
_ما بكيفك نص ساعة وتكوني عندي يلا.
_أووف يا ننا ما..
_مُستنياك يلا باي.
بعرف نود ما هتعرف تحكي لي كل شي بالتلفون وبما إنو كريم إتصرف كدا معناه الموضوع كبير شديد لأنو عمرو ما عمل كدا وبالعادة هو بتريث قبل يتخذ أي قرار وياما كانت بينهم مشاكل ونقاشات كتيرة بس ما وصلت الحد دا.
ما كُنت عايزة أطلع أنا أخدت إجازة من الشغل وننا اكيد جاية مُرهقة راجياها شغلة البيت وراجلا العصر هيجي بس كمان بجد هطق من الزعل وما عارفة أتصرف كيف لبست عبايتي وأخدت ركشة ومشيت ليها.
_مالا عيونك واقعة كدا؟
_ما كنت ببكي والله.
_بتوقعي نفسك براك.
_أعملي لي عصير ليمون ونتفاهم.
_تعالي معاي طيب.
دخلنا المطبخ ننا بتخلط في العصير وأنا بحكي ليها عن تصرف كريم الضايقني جدًا دا وأشيل أتبكى ليها وإنو مهما حصل البلوك ما حل وليه يتعامل معاي كدا وحتى لو رجعنا ما هنرجع زي اول والنغمة المعهودة.
_نُود كملي عصيرك دا الاول.
_مِسخ لي ياخ.
_كريم حاليًا بكون مُتضايق أكتر منك إنتي تستكتي خالص لأنو عندك زول يقيف معاك ويسمعك وبتفضفضي بس هو..عارفة طبعه صح؟
_بس يا ننا هو المفروض..
_غلطانة يا نُود ما تفترضي..ختي نفسك مكانه!
_يعني أسيب وعاد؟
_ما تسيبيها بس لو كان كلمتيه هو أحسن.
_كُنت ناوية أكلمه.
_متين؟
_اوووف يا ننا ما مُمكن تحسسيني بالذنب أكتر.
_طيب أهدي حابة تتكلمي معاه من تلفوني؟
_ما هكلمه لو ما هو رجع كلمني.
_بتعقدي الموضوع..إتصلي ليه يمكن مستني منك مكالمة!
_يبلكني ويستنى مني مكالمة؟دي شنو حركاتي دي؟
_بالأخر ما ليو غيرك!
_بحب كدا بس أنا زعلانة عشان زعلته.
_غريبة شديد والله ما في زول بفهمك.
_إلا هو يا ننا.
_هتموتي من غيره إتصلي شوفي تلفوني فيه رصيد!
فضلت مُحتارة أتصل ولا لا بس بالأخر قلت هتصل ليه بعدين أسي هيكون مشغول.
إتونسنا شوية بعد ما سمعتني خالص لاحظت ليها مشوشة سألتها في شنو؟
_عزيز!
_ماله؟
_قال عنده مشاكل في الشغل بس حاساه مُتغيير ما طبيعي خالص!
_مشاكل شنو؟
_مشاكل كبيرة الصراحة يعني وشكله عليه دفعيات كتيرة مفروض يخلصها لأخر الشهر دا والشغل واقف مشروعهم اللي معتمد عليه ما كِمل وإحتمال كبير لو ما خلصه في الوقت المتفق عليه هياخدو منه ويسلموا لمهندس غيره.
_لا حول ولا قوة إلاّ بالله وهيعمل شنو؟
_ما بعرف والله الصباح طلع مهموم تخيلي بقى يساهر في مكتبه ويصحى من غير ما يشرب شي يطلع وبرجع أخر الليل!
_قلبي عليه والله.
_ضربتني في كتفي..بكاشة قلبك علي ولا على كريم ولا على عزيز.
BY «عَلى الهَامِش!💛»
Share with your friend now:
tgoop.com/RewayatNeedoo/6727