tgoop.com/RewayatNeedoo/6721
Last Update:
___
_وِعاد الغدا يلا.
_نُود رحيم كان بتكلم معاي فجأة سمعت جوطة وقفل الخط برجع ليه ما بيرد علي.
_جوطة زي شنو؟
_ما بعرف زي كأنه زول بنده عليه ما قدرت أميز الصوت بس من نبرته واضح إنه ما صوت طبيعي.
_هو ساكن مع زياد صح؟
_أيوة.
_ما تشغلي بالك تعالي نتغدا أنا هموت من الجوع وماما مستنيانا وبعدين نشوف الهيحصل.
يداب إتحركنا تلفونا إتصل.
_دا زياد.
_ما هتردي صح؟
_هرد عشان أفهم منه عايز شنو أساسًا قبيل إتصل علي بحكي ليك قال شنو.
_طيب ردي سريع وإختصريه أنا مستنياك.
_عايز مني شنو يا زياد؟
_بس حبيت أقول ليك رحيم اللي متقوية بيه دا خليه ينفعك رفضتي تصدقيني بي سببه صح؟
_زياد ما دخل رحيم في قصصك الـ..
_هو اللي دخل نفسه بينا ويستحمل عواقب أفعاله.
_عملت ليه شنو؟
_خايفة عليه؟
_إنت ما كويس صح؟فيك حاجة غلط..
_أي لحقتي تشوفيني مجنون صح ولسة نحن متشاكلين بتكلميه 24ساعة كمان!
_زياد إنت لو في دماغك شي غلط ما معناها كل الناس تفكيرا زيك.
_ما بتهمني الناس وما بهمني هو وإنتِ ذاتك ما بتهميني بس إتأكدي لو حاولتي مُجرد مُحاولة تلعبي علي ما تلومي إلا نفسك "وقفل الخط."
كٌنت بعاين لملامح وشها اللي إتغيرت فجأة اول ما خلصت إرتمت في السرير وغطت وشها وبدت تبكي.
ما في شي هيضيع البت دي غير بكيها دا الود دا إستنزف كل طاقتها بقت تواجهه أي مشكلة بالبكي مشيت قعدت جنبها
_وعاد في شنو؟
_زياد دا ناوي يخلص علي شكله!
_أهدي..حضنتها وهي لسة بتبكي.
_قال ليك شنو؟
_أساسًا قبيل إتصل علي قعد يعتذر وإنه ماري بضغوطات وحيتسجن لو بيعة العربية اللي بينه وبين الزول اللي جابه ليه ما تمت لأنه هو إتصرف في القروش فكان متنشن وزهجان وما حب المرة دي يدخلني في تفاصيله ففصلني بالطريقة البايخة دي.
_وإنتِ صدقتيه؟
_المرة دي ما صدقته ووضحت ليه إني ما حابة نكمل وأنا تعبت منه..لما ما أديته فُرصة قال لي:
-لاقيتي رحيم ليه؟
_فرفضت أبرر ليه وإختصرته وياهو أسي إتصل بهدد فيني.
أنا إتصدمت من اللي سمعته وإتوترت لأنه زياد دا واحد مريض ما طبيعي تصرفاته وإستضعافه لوعاد بحجة إنه مضغوط نفسيًا أو وضعه المادي ما تمام دي كلها ما أسباب تخليه يتصرف زي المجرمين كدا.
هديتها وقلت ليها حاولي رقم رحيم تاني فرجعت إتصلت عليه رد :
_أنا مؤمن صحبه لرحيم لقيت مكالمات كتيرة من الرقم دا في شي مهم؟
_وين رحيم؟
_إنتِ منو؟
_زميلته عايزاه ضروري شديد.
_ما بيقدر يكلمك أسي.
_ليه؟
_نحن في المستشفى أرجعي ليه بكرة لو الموضوع بيتعجل.
_ماله قبيل كان معاي كويس!
_مافي حاجة خطيرة حصلت مشكلة بينه وبين صحبه و..
_زياد صح؟
_أيوة بتعرفيه؟
_المهم رحيم ماله هو كويس الحصل عليه شنو وين انتوا؟
_مطعون..نحن في مستشفى(.....)
وعاد كانت بتتكلم بصوت مرعوب وملامحها ما بتتفسر خالص وأنا كنت جنبها وبقول يارب ما يطلع الفي بالي صح
بعد فهمت منها الحاصل حلفت تمشي المستشفى حالًا وطبعًا كريم لو عرف هتحصل مشكلة وكيف أقنع ماما إننا طالعين بعد المغرب.
لقيتا لبست عبايتها وقالت لي:
_إنتي خليكي أنا همشي أشوفو وأجي أقفلي تلفونك من كريم لحدي ما ارجع هتصرف مع خالتو هدى..وطلعت ما إنتظرتني.
لفحت اقرب عباية ولحقتها لقيتا بتتكلم مع أمي وبتقنعا..
ماما كانت ما مُقتنعة ورافضة بس وِعاد فضلت تحنس فيها في الأخر إقتنعت.
طول الطريق وِعاد تلوم في روحا وأنا خايفة كريم لو عِرف هيعمل شنو وكمان نسيت تلفوني في البيت وطالعة بعباية وشبشب البيت وشعري ما مسرح كويس وما إتحجبت وحالتي بالبلا دا غير وعاد اللي لبست عباية مفتوحة ولبستا اللابساها قصيرة وما معانا قروش أساسًا.
اول ما وصلنا حاسبت سيد الترحال بي بنكك ودخلنا المستشفى مشت تطمن عليه لقينا صحبه حكى لينا إنو رحيم إتصل عليه وصوتو مبحوح وقال ليه تعال لي سريع..لما وصل لقاه غرقان في دمه.
بقينا منتظرين الدكتور يطلع يطمنا عليه وأنا قلبي في يدي من التصرف العملناه ما عارفة أنا خايفة على رحيم ولا وعاد اللي متبهدلة ولا من ماما الحتعمل لي محضر ولا بابا لو إتصل ولقاني ماف بعد الوقت دا ولا كريم إذا عرف هيعمل فينا شنو.
___
_السلام عليكم خالتو كيفك؟
_أهلن يا ولدي كويسة الحمدلله..إنت كيف؟
_بخير وعافية البنات ديل ما بردوا علي مالهم؟
_والله طلعوا وِعاد عندها صحبتها أمها تعبت وجروا بيها المستشفى قالت ما بتقدر تسيبا براها ونودين دي مشت معاها.
_طيب ما عارفة المستشفى وين؟
_في(....)
_هأمشي أجيبهم ما تقلقي عليهم.
_الله يطمنك يا ولدي.
____
_الرقم الذي طلبته لا يستجيب.
_أوف نود ما معقولة جادعة تلفونا دا وين الواحد ما يحتاج ليها خالص..هحاول عزيز تاني.
_الو..
_جاي جاي.
أقل من دقيقتين والباب إتفتح كنت خايفة ومقلقة علي عزيز والكهربا قطعت ما حصل سابني للزمن دا طلع من قبل المغرب وما كان برد علي..اول ما دخل مشيت عليه.
BY «عَلى الهَامِش!💛»
Share with your friend now:
tgoop.com/RewayatNeedoo/6721