tgoop.com/RewayatNeedoo/6635
Last Update:
مؤمنة جدًا إنو المسافة إتخلقت عشان نحدد بيها موقفنا لأن
"الأشياء في المرآة تبدو أقرب مما هي عليه"
ساعات بنحتاج نبعد شوية ونخلي مسافة بينا وبين الحاجات البنحبها .. عشان نعرف قيمتا ومدى أهميتا عندنا وعشان نعرف نحافظ عليها.
مشاعرنا بتتجدد بالبُعد .. على قدر ما هو سيء بس بورينا مكانتنا في قلوب البنحبهم.
بحب المسافة البتكون بين إتنين زعلانين من بعض .. المسافة اللي بتخلي واحد إختبر يعني شنو يعدي اليوم بدون التاني فعشان يقصرا يبادر بالمسامحة.!
في مسلسل ما :
البطلة كانت زعلانة من البطل وماخدة موقف فقررت تبعد .. كُل الحواليها كانوا شايفين إن الموضوع ما بستاهل .. بس هو إختبر بُعدها وعِرف غلطو فقرر يتغير ويصّلِح الإتخرب
في نفس ذات اللحظة هي لما إتسألت يعني دا قررارك النهائي؟
فكان ردها : "ما بالساهل الواحد يتخلى عن حبو"
جُملة بسيطة بس بتورينا إنو البُعد عمرو ما كان قرار .. !
نحن ما بالساهل نقرر نبعد .. ولا في إنسان طبيعي بيختار يبعد بإرادتو.
نحن بس عايزين نرجع لورا شوية عشان نعرف نقدر الموقف .. !
عشان نختبر صِدق شعورنا تجاه حاجة كانت طُول الوقت قدامنا .. قدامنا لدرجة ما بنتخيل الحيحصل شنو لو خِسرناها !
موقف طبيعي الواحدة ترجع لأهلها لما تحصل مشكلة بينا وبين زوجها .. بس الما طبيعي إنو لا المجتمع ولا أهلها بكونوا مقتنعين إنو المشكلة البسيطة دي بتخليها تاخد قرار كبير زي دا .. بس جربوا مرة تسألوها هي عايزة شنو؟
لأنو ما كُل مسافة بكون القصد منها إنفصال ..!
ما بنقدر نهتكر الناس .. من حق أي زول يقرر إذا هو بقدر يتمسك أو لا ..!
ما بنقدر نجبر شخص يهزم المسافة لأنو دي معركتو هو .. وهو الوحيد البقرر إذا مُستعد يربحها أو يخسرا .
عشان كدا أنا بوافق جوزيف أوكونور لما قال :
"أحيانًا هذا هو الحبّ أيضًا: أن نترك أولئِك الذين نُحبّهم أن يُغادروا"
#على_الهامش:
"الآن نحن غُرباء والمسافة بيننا حقيقية💔 "
#نُوودين_بِتْ_مِنْ_حُبّ.
BY «عَلى الهَامِش!💛»
Share with your friend now:
tgoop.com/RewayatNeedoo/6635