tgoop.com/Omwiessam/788
Last Update:
نعي ( لاربعين السيدة زينب ع )
.....................
ونه
الغريب شلون بأرض الغرب ونه
و گبر زينب لهلها انسمع ونه
تعتب و العتب شيفيد ونه
على المحد اجه و ينصب عزيه
ليلاه
هاليوم اربعينج صار ليله / ليلاه
عليج الدمع يخت حسين سيلاه / ليلاه
غريبه و مااجوج احباب ويلاه / ليلاه
تبجي اعليج يالحره المسيه
محد اجه و ينحب عليها
و ما يدري بزينب وليها
هاليوم اربعين و ما يجيها
محد اجه لزينب تعنه
يم الگبر يجذب الونه
و ايصيح زينب من اهلنه
شمحلات اهلها يحضروها
يم الگبر زينب نعوها
عزيزتهم و واجب يذكروها
محد صرخ يمها الحبيبه
و يبجي و ادموعه سجيبه
و ايصيح زينب يا غريبه
غريبه و بالغرب ماجوها الاخوان
زينين اهلها و كلهم احنان
و اليوم اربعينج يم الاحزان
هاليوم اربعينج يالعقيله
محد اجه و دمعه يسيله
ويلاه يالمتي عليله
ندري اليموت بأربعينه
تحضر هله و تجذب ونينه
جا وينه عنج ابو سكينه
وين الحنين الليله يحضر
وياه يجي ذاك الامشكر
وحدج بقيتي الله اكبر
محد اجت يمج و تنعه
اتصيح يا زينب بفجعه
تنعاج و الكسرو ضلعه
وين الحبايب هالمسيه
تنعاج و تسوي عزيه
يم الحزن سوده عليه
بنات حسين كون الليله يمج
يصيحن يعمه و اه متنج
يا وسفه كلها ابعاد عنج
كون اللطم و النوح ساعه
يم گبرج و يحله وداعه
و يذكرن الطحنو اضلاعه
-------------------------------------------------------
*تمت بأقلام خادمات اهل البيت ع*
*✍ آلــشــاعرة 🎤 والملا رغــد البهادلي*
*✍آلــشــاعرة رغــد ام وسام الفرطوسية*
ذمة عدم حذف الاسم وغير مبرئ الذمة كل من ياخذ من الكلام وينسبه له
https://www.tgoop.com/Omwiessam
BY الشاعرة رغد ام وسام
Share with your friend now:
tgoop.com/Omwiessam/788