tgoop.com/NasimAlhamdawi/12042
Last Update:
إلى رقيه عزيزة الحسين عليهم السلام
مــن مــــثلها•• طــفله مــاتت مــن بــچيها
مــن مثــلــها•• راس أبــوهــا إبين إديــــها
يمــكن محــاچيها كلمه•••بيــها ماتت هي يمه
★★★
والدي مــره ســألــــتــه ڪِّلبي كالت مــنفجع
ليش عــينك من تصدلي. تجري بــويه بالدمع
مــن أشوفچ أذكر إمــي. ڪال مكسورة ضلع
وذكر السطره على خدها وأدري خدچ ينــصفع
من سبوها•• بخدها چم ضالم صفعها
لراس أبوها ••باالألم تــشرح وضــعها
وغِسلت بدمعتها دمه•••بيها ماتت هي يمه
★★★
وسدت خدها على خده. ونترس خدها بدمه
عمه صاحت ماي اريدن. والدي مــــات بضمه
أرده أشــربنــه بــديه. حــته عمــــه إنڪلمه
إفتــح عــيونك أكلــه أنه الأشــبه فــاطمــه
بويه صدلي ••وأحسب سياط على ضهري
مــنهو كــلي. •• انه يتــــمني على زغري
بحسرة شمت راسه شمه••بيها ماتت هي يمه
★★★
تحچي وي راسه وتكله يسري أبد ماينحمل
بــويه ورمــاد المــخيم. صار لعيوني ڪحل
شڪد بنات بعمري أشوفن. تلعب ودمعي يهل
من ذهب عدهن معاضد. وبيدي أساور من حبل
ياهضــيمه•• راسي امسحنه بأديه
ڪل يتيــمه•• كون تتــسمه رقــــيه
ضلت بعبره تكلمه•••بيها ماتت هي يمه
★★★
تحچي قصتها الأبوها. من إجت يم الجسد
شافت السلاب إجاها ويم أبو الأكبر كعد
نضرت إيسلب ثيابه ويكطع بخنصر أسد
التراچي تكله إخذهن والدي عوفه إنضهد
من سمعها ••طكــــها بالسوط بمتنها
هم صفعها•• وهم أخذ قرط من إذنها
بدمعه والدها تحشمه ••بيها ماتت هي يمه
★★★
چان إبوها شكد يحبها. هــي عــنده مدلله
من حچت قصتها يمه عيونه ضلت هامله
الشمر كالتله طڪني بالسياط وحــرمله
راسه ضل بالشام يبچي. وڪِّلبه وَن بڪربله
وياها يحچي•• ڪلمه بس تعرفها هيه
راسه يبچي•• مــيت وقَــــبل رقيــه
صَرخت الطفله تألمه•••بيها ماتت هي يمه
★★★
عالرمح تقره سمعتك. بالڪهف وتــألــمت
ڪل فرض لوجت صلاته إنت أسمعك أذنت
تڪله من زغري يبويه إوياك أصلي أتعلمت
بويه خل راسك يأذن. حته أحسك مامتــت
بــيه لهفه•• أسمع بصوتك أذانــي
حته أشفه•• ومايضل جرح بإذاني
زَيدت هالطلبه همه•••بيها ماتت هي يمه
★★★
الشاعر
نسيم الحميدايhttps://www.tgoop.com/NasimAlhamdawi
BY الشاعر الحسيني نسيم الحميداوي
Share with your friend now:
tgoop.com/NasimAlhamdawi/12042