tgoop.com/MuhammadAkbarAzim/831
Last Update:
Устоз Мубашшир Аҳмадни таниганимдан буён самимийлик, дини ҳамда миллати учун жонкуярлик, яхшилик узра пешқадамлик, камтаринлик ва кўплаб яхши сифатлар устида кўрдим.
Ватандошларимизнинг дардини кенгроқ оммага етказган, халқимизнинг асрлар ошиб бизгача етиб келган қадриятларига болта урмоқчи бўлганларга қарши сабот билан туриб берган киши ўлароқ танидим.
Ҳар қандай бузуқ, яъни қадриятларимизга ёт ғояларга қарши очиқ, эркин мунозарага доим тайёр бўлиш билан бирга ўзининг кучли асосга эга бўлган ғояларини жамиятимизнинг фойдаси учун кўпчиликка баён қилиб келдилар. Бор куч-ғайратларини халқнинг фаровонлиги, юртимиз, динимиз ривожи учун йўналтирганларини эътироф этмай илож йўқ.
Қолаверса, фикрга очиқ бўлганлари туфайли ёшу қарини бирдай тинглаб, қулоқ тутишлари алоҳида таҳсинга сазовор.
Дин илмида юртимиздаги мўътабар уламолардан бўлиб, мўътадилликни доимий сақлаб қолдилар. Шу пайтгача ўзимда уларнинг бирор фикрларига эътироз билдиришга сабаб кўрмадим, ўйлайманки, жуда кўп кишилар ҳам шундай ўринда ўзини топган.
Бугун у зотни ҳибсда, ҳозирги ҳолатидан халқни хабардор қилмай сақланиши, давлатимиз обрўси учун путур етказибгина қолмай, мансабдорларимиз фикрга очиқ эмаслиги, ўзининг позициясини куч ишлатиш билан бўлса ҳам сингдиришга уринишига далолат қиляпти.
Халқ тарафидан сайланиб, халқнинг дардини эшитиб, уларнинг хотиржам ҳаёт кечириши учун хизмат қилиши керак бўлган кишилар, афсуски, халқ учун жонкуяр бўлган пешволаримизни ҳеч битта асос кўрсатмай ҳибсга олиш йўлини лозим тутяпти. Бу эса бизни мансабдорларимизга бўлган ишончимизни буткул йўқотишимизга сабаб бўляпти.
Аллоҳ тез фурсатларда устозга нажот берсин, офият устида бўлишларини насиб қилсин!
BY Муҳаммад Акбар Азим 🔻
Share with your friend now:
tgoop.com/MuhammadAkbarAzim/831