tgoop.com/Mohammed_Hassan/746
Last Update:
عالضايعين انه انحـسب
لـحـد يحبني ولا احــب
ليلي وانهاري اويه الذنب .. حرام
ذبيته كــل عمـري الـمـضه
جـيت وعُـيوني امغـمـضه
گلبي استحه وطالب رضه .. وغرام
انه اسف .. استحيت وگتلك ..حُسين
انه اسف .. و الـوذ ابـخـتك .. حُسين
لاتـهـدني .. اريـدن حُـبــك .. حُسين
انه اسف .. امس جي عفتك .. حُسين
بس لا اخسرك وامشي الضياعي
وشيرجعه گلبي عليك
مو حلوه مني كل مره اعــوفـك
وترجع تلمني بإديك
رحمتك تلمع اگبالي و اسد عيني
اضيعك انه جنـدوب و تــدلـيـني
هل من توبه يامولاي
....................
لاتكشف اوراقي لان
اعمالي ابد ماينحجن
سّــود مـلفاتي الزمن .. وطفيت
جنـت انه عـايش ملتـهي
بشي مايخصني ومو الي
الـفي رحمـتك يابـو علي .. اجيت
انه راجع .. واجر بروحي .. حُسين
انه راجع .. اريد اجروحي .. حُسين
حزن وحُب .. اعيش ايامي .. حُسين
انه راجع .. وشفت جف يوحي .. حُسين
جـفـك يـأاشــر ااتـگـرب يـگــلـي
وبي خمس اصـابع اشــوف
وجف دامي اشوفه وبلايه خنصر
خلاني كــلشي اعــوف
اشوفن جفك الدامي يــدنـييني
اضيـعك انه جندوب و تــدليني
هل من توبه يامولاي
.........................
امن الدنيه هاي اشحصلت
امن الناس كلشي ماشفت
بـس ابخدمتك من صرت .. جبير
حبك هدم عمري هدم
رد وبناني وصرت اسم
كل هذا وانت ابلا هدم .. احير
منو غيرك .. قبل بالمثلي .. حُسين
منو غيرك .. بعبيده ايدلي ..حُسين
انه ضايع .. ولگاني المجلس ..حُسين
منو غيرك .. تعــال يگلي .. حُـسين
ياهو اليــخلي باله عـليه
ويلفي واحد عصاه
وياهوه مثله يقبل عدوه
بالحر قبل من اجاه
اريـدن حـر الك ثـاني تـسويني
اضيعك انه جندوب و تــدليني
هل من توبه يامولاي
...................
ارجـوك لاتستبدله
گلبي منو غيرك اله
خلي يضيع بكربله .. ويروح
خلي يروح اويه المشن
وعافن خدرهن والضعن
اعيونك عليهن غمضن .. جروح
عله خدرك .. تـــدور اعـيونك .. حُسين
عله خدرك .. وتشوف اضعونك.. حُسين
سوه طلعن .. يركضن حيره .. حُسين
عله خدرك .. تحير اضنونك .. حُسين
جروحو حميتك بركضة بناتك
وعينك ترسهه التراب
والخيل اجتك ياهو ليشيلك
مـوتـني هذا المصاب
منها والحزن غطه سمه اسنيني
اضيعك انه جندوب و تــدليني
هل من توبه يامولاي
..................
لاجلي انت نايم عالترب
جدا الا الـلطم عــالگلب
وللموت خل دمعي يصب .. واصيح
اتـخـيـل ابـالــي الــهــظــم
من حاوطك جيش الخصم
ابـن الـنـبـي ومـاتـنــرحــم .. ذبيح
اجت اختك .. تدور عنك .. حُسين
اجت اختك .. تريد تحضنك .. حُسين
لجن انت .. ذبيح وعاري .. حُسين
اجت اختك .. تنوح الحزنك .. حُسين
هاي المصيبه الخلتني ارجع
و اصـرخ اويلاه حُسين
وتبقه المصيبه زينب غريبه
وشافتهه بالحومه عين
غريبه ام الخدر صارت عمت عيني
اضيـعك انـه جنـدوب و تــدليـنـي
........................
ابو حميدة الشويلي
اللهم عجل لوليك المنتقم الفرج
https://youtu.be/T8oDHO2vtSo?si=ofZOkAQcyoK388sP
BY ابو حميدة الشويلي
Share with your friend now:
tgoop.com/Mohammed_Hassan/746