💰 $1,000,000 berilsa, nima qilasiz?

Avtobus. STOP tugmasi.

Hech o‘ylab ko‘rganmisiz, avtobusda Stop tugmasi nima uchun kerak?

1995 yillar. O‘zbekistonga biz uchun yangilik va zamonaviy hisoblangan Mersedes o405G avtobuslari olib kelingan. Bu Mersedes avtobuslarining qiziq joyi, ularda to‘xtatish uchun Stop tugmasi bo‘lar edi.

Stop tugmasi aholi uchun yangilik edi. Odamlar nima ekaniga qiziqib, bosib ko‘rar edi. Har bosganda "Ting-ting" degan yoqimli ovoz chiqar edi. Yana ting‘illatish uchun 2-3 marta bosadiganlar ham topilar edi.

Endi o‘ylab ko‘ring, yoningizda kimdir bosdi. Siz ham bosgingiz keladimi? Ko‘pchilik aynan shu uchun, biroz kutib, bosib ko‘rar edi.

Keyinchalik haydovchi okalarimiz Stop tugmalarini o‘chirib qo‘yadiagan bo‘lishdi.

O‘zi bo‘ladimi har daqiqa ting‘illashini eshitish. Vaholanki bir kishi boshsa, avtobusning old qismida "Stopping" yozuvi chiqadi. Haydovchi bilib, bekatda to‘xtaydi.

...

Yangi bilim ham xuddi shunday. Toki o‘zingdan o‘tkazmaguncha his qilmaysan, xoh dasturlash tili bo‘lsin, xoh loyiha boshqaruvi, yoki yangi stanokda ishlash. Barchasiga uquv kerak. "Nima uchun?" - degan savolni berish va sababini o‘rganish kerak.

Tayyor yechim berildi deylik. Olib ishlatishni boshlaysan. Muammoga duch kelganda esa yana o‘sha, senga yechim bergan odamni izlab qolasan. Shunday ekan, senga yechim berilganida o‘zing ham shunga o‘xshash narsa yasashga urinib ko‘r. Mahsulot tayyor bo‘lishi jarayonini o‘rgan.

Jarayonini o‘rgan!

Balki shunda rivojlanish tezlashar. Aks xolda senga berilgan $1,000,000 oy oxiriga ham yetib bormay, tugaydi.

...

Yosh dasturchilar, SI yordamida kod yozishda ehtiyot bo‘ling. Tayyor kodni ishlatib, go‘yoki ishini tez bitirgan bo‘lasiz. Vaholanki ertaga Stop tugmasini bosadigan bo‘lib qolishingiz mumkin.

Yoshlikda olingan ilm, toshga yo‘nilgan naqsh kabidir.

30.09.2025 London
@DrAlgorithm