tgoop.com/DoaaAIamry11/27003
Last Update:
★ أبوذيات ونواعي متعددة لـ أباالفضل العباس ★
دگ صدره الگمر لاخته ..وكفلها ((الكفالة))
روحه انطاها والعين ..وكف الها ((كف اليد))
ولا عدوانه تگربها ..وكفلها ((أبعدهم))
ولآخر نفس وفى الوصيه....
✍🏻#ولائـية_وافتـخر (دعاء العامري)
حسين ابكربله شدبيك ..ظهره
والحگ سيدي بالسيف ..ظهره
ولاهمك هذاك اليوم ..ظهره
((لأن انت ابن حامي الحميه ))
ماهمك عطش مولاي ..منحر
وبسيفك للكفر گطعيت ..منحر
ساندته اخوك. حسين ..منحر
((وقدمت العمر لترابه هديه))
عيون حسين الك مولاي ..تربى
و يالبدمك رويت اليوم ..تربى
الشجاعة من الزغر وياك ..تربى
((تشهد للشجاعة الغاضريه))
✍🏻#ام_زهراء_الزيداويه_البصراويه
وين العز يروحي ..ونچفيلي
صرت انهض واعثر ..ونچفيلي
من ونّيت اسمعه ..ونچفيلي
يگلّي العذر مگطوعات اديّه....
✍🏻#ام_محمد_الحجاج
ضحى بروحه وي عينه ..وكفه
وعليه الحزن ما أبطله ..وكفه
أخويـة البشدد وفـى ..وكفه
يتاج المرجلة ونفسك أبيه....
✍🏻#آلــــّعــلّويِـــه آلّمٌوسويِــــۿ
ســــبع عباس بالحـومه ..وگدها
شـعلها النار بين اعــداه ..وگدها
كرف بالجــيش ماخـذها ..وگدها
يطش ويلم أبن حامي الحميه....
✍🏻#ام_عباس_الحسیني
✿••✿<>••<>✿••✿<>••<>✿••✿
★ #يقرأ مُشابه لـ نعي سيد فاقد ( دليني اليحب شيسوي لو تاه ) #فقط بداية اللحن لكن تختلف التحويلة بالنهاية ★
شبيدي اعليچ يختي غمضت العين
عذريني يگلها انتي والحسين
عفتكم مو بدية .. واخذتني المنية
لون باقي فلا تگربكم اعداي
ولاخلي أحد عطشان للماي
وميحرگون الخيام .. وليفجعون الايتام
عليكم عيني مشبوحة وجرية
بقت حسرة بدليلي للمنية
أخاف مقصر آنه .. لو صحتو لوانه
صح فوگ الرمح مرفوع راسي
بس ليكم بقت تنظر حواسي
واتألم عليكم .. من واحد يجيكم
✍🏻#ولائـية_وافتـخر (دعاء العامري)
✿••✿<>••<>✿••✿<>••<>✿••✿
★طور البس حدادي★
تركض ابحيره .. صوب الشريعه
مذهوله تنظر .. كفوف القطيعه
خويه يا عباس .. تنظرني ال جناب
إنهض دخِيلَك .. بحق الوديعه
خوَفّني سلاب .. يركض ورايه
شامت يقلي .. طاحت الرايه
يالواعدتني .. أدري بحميتك
شو عني غافي .. بطف الرزايا
يا أبو الِاحساس .. قوم إليّ عناي
حُرمه ونحيله .. وتتراجف اعضاي
رِدنا المدينه .. مو مالت اجمال
ولا ادخل السوق .. وتتشمت اعداي
✍🏻#خادمة_أبي_الفضل
✿••✿<>••<>✿••✿<>••<>✿••✿
★التغريد الحزين ((للشيخ زمان الحسناوي)) -- طور عبد الحي قمبر ((ياجبريل نترجاك)) -- طور لفى عاشور للشيخ ((سعيد المعاتيق))★
••{{مولاتي العقيلة تنعی اخيها}}••
اريد اعمي عليك العين يلضحيتلي بعينك
وابچيك العمر ماهيد وماسد ربع من دينك
يلمخاويني . يلوفّاي يلشاريني بسنينك
بطور الفاگدات انعاك وون ون اعله چفّينك
والطم لطم يوجع حيل اعله خوّه البيني وبينك
تمنيتك عدل ياحيد من حرگو صواوينك
اصعدت ع تل . صحت عباااس يصگار الزلم وينك؟
محتاره شگول عليك وشعدد خويه من زينك
✍#ام_محمد_الحجاج
✿••✿<>••<>✿••✿<>••<>✿••✿
★مجاريد -- عاشوري وغيرها من الأطوار الشعبية★
أگعد و ردّنَه اليعيلون
بينه العده گامو يشتمون
واطفالنه منهم يخافون
شايل يبعد الحيل كله
عگبك ترى صرت بمذله
نومك ترى موش بمحله
✍️#علويه_ام_فاضل
✿••✿<>••<>✿••✿<>••<>✿••✿
★نعي گرناوي★
تعال وخل أودعك ياضوة العين
ترى بيوم الرحت جتلي المنيه••
شايل يالعضيد ومحزنه الروح
آنه بطرواك كل صبح ومسية••
شحالي لو رحت عني يعباس
يريته الموت يلفينه سوية••
يخوية بغيبتك ماضلت عيون
أناديك بحزن بس رد عليه••
يكفال الضعن ياستر وفياي
آنه أنصبلك عزة بكل مغربية••
✍🏻#آلــــّعــلّويِـــه آلّمٌوسويِــــۿ
انصبلك عزيه سنين وسنين
وانوح عليك يلتسوه المناحه••
مو بس عين اعمي عيوني لثنين
وابچي امن اول الليل لصباحه••
ماينگطع حزني عليك يازين
من عگبك بعد ماريد راحه••
المضيعه اخو مثلك يوفّاي
تبطل ونينهه فشله وگباحه••
الك بحشاي نار التحرگ ضلوع
وعليك الگلب تتلاچم جِراحه••
✍🏻#ام_محمد_الحجاج
✿••✿<>••<>✿••✿<>••<>✿••✿
★طور الجفيري -- الحدي السريع -- ياام الولد راح الولد ((الشيخ زمان الحسناوي))★
ياابا الفاضل يا كل هلي
اختك غريبه ابلا ولي
اصرخ يا خويه وكافلي
راح الاخو منهو إلي
اعله النهر شفتك ذبيح
ابلايه الچفوف الدم يسيح
لا جود ولا رايه وطريح
طاح العمد وسفه اصيح
✍🏻#ام_سيد_يعقوب_الموسوي
✿••✿<>••<>✿••✿<>••<>✿••✿
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tgoop.com/DoaaAIamry11
BY ♢الُشِاْعرَةِ وَلُائـيَةِ وَافَتْـٌخرَ♢
Share with your friend now:
tgoop.com/DoaaAIamry11/27003