tgoop.com/Dhaifsalman/9331
Last Update:
المجاراة بعنوان ( اليمن مع غزة في مواجهة الاجرام الصهيوني
والمآلات يصنعها الله )
البداية #يحيى_العطيف
صنعاء معا الباري تسجل موقف
حتى ولو تمسي وهي مقصوفه
يستهدفو صنعاء وهي تستهدف
ما ايداتها مثل العرب مكتوفه
قل للعرب لازال غزه تنزف
وبالخطر كل الدول محفوفه
#ضيف_الله_سلمان
وضع العرب مخزي وواقع مؤسِف..
الا اليمن بالحق رص صفوفه..
وموقفه موقف قوي ومشرّف..
في جبهة الاسناد سل سيوفه..
والفرط يتشظى ويافا تنجِف
و الباب مغلق والسفن موقوفه..
#عابد_المدم
العجرفة بلوى على المتعجرف
ومن فصول اللعبة المكشوفة
والكل عارف والممالك تعرف
ان اليهودي خطته معروفه
المنحرف في المنهج المتحرف
يا رب حاكم با ينتف صوفه
مشروع ماهو يا عرب متوقف
يا مصر بلغ نجد وأهل الكوفه
#شداد_حميد
صنعاء كما يوسف واخوة يوسف
كل العرب واعمالهم معروفه
مع الاسف حال العروبه مؤسف
بتدفع الجزيه وهي معطوفه
افعل عليهم اكس كامل واحذف
دام الشهامه منهم محذوفه
#نشوان_الغولي
حرب اليمن لا بد ما تستنزف.
طاقاتكم يا اهل القوى المهفوفة.
يا كم قصفتونا و ربي يلطف.
يستر علينا و السما مكشوفة.
من جرحنا و اكبر مصيبة ف(الطف).
تطهّرت (صنعا) من اهل (الكوفة).
#هادي_حسين_الرزامي
من هو مع الله لايحاول يوقف
جهاد لين المعتدين تعوفه
والنصر قادم رغم من يتعجرف
والتضحيات الخالصه مخلوفه
بانقصف اسرائيل حتى ترعف
في بأسنا باذن الإله حتوفه
#جبر_المسعدي
ذي ماء عرف(بأس)اليمن بايعرف
بكره ونفسه ب(الخطر)محفوفه
احنا الكرامه والشرف والمشرف
على الشرف و(الموت)حياء شوفه
لوماء اللطيف الله ماقالنا الطف
بناء ولانحمل كلف معروفه
#الشاعر_خالد_البصيري
قال اليماني للكرامه موقف
واحنـا مواقفنا لها معروفه
ما همنا مهما يقول المرجف
وذاك ذي همه على مصروفه
الله وعدنا وعد من لا يخلف
نحج لا مسرا النبي ونطوفه
#فارس_المعزبي
مابه لغزة غير صنعا مسعف
خلَّت مطارات العدو منسوفة
ومستمـرة للمـوانـي تقصِـف
يوم العواصم خانت الملهوفة
صنعا لمظلوم اهل غزة تنصف
وابطالها من حولها مصفوفة
#عماد_العملسي
ذي ماعرف لليوم لازم يعرف
ان اليمن برجالها محفوفه
رجال من حوض المناياء تغرف
ماحد سوى رب العباد اتخوفه
عيوننا من قصفهم ماتذرف
وجلودهم من ضربنا منتوفه
#ابوشوامخ_الوعل
محنا من أللي لاوعد بايخلف
ويختلق عذره ويشكي اضروفه
إذا الـعـدو اتـمـادى نـقـلـه وقــف
احنا اللذي اول من قذف مقذوفه
قـنـف بـراسـك يـا يـمـنـا قـنـف
وخل الاعـداء روسهم معطوفه
وحدك مـع غــزه طلعت المنصف
ضـد الـعـدو وابـواقـه المـلقـوفـه
#عبدالله_الجرفي
شعب الكرامه لا وعد ما يخلـف
لبى استغاثـة غـزة الملهـوفــه
اليوم صوت الفرط الصوت يردف
غدوه حصون اليهوده منسوفـه
يا سيـدي وكّـف ليافـا مشـرف
من قوم بالبأس القوي موصوفه
#مانع_البوساني
صنعاء الأبيّه لا اوعدت ما تخلف
لها مواقف وآضحه مكشوفه
واعلامها فوق الفضاء بت رفرف
شيمه على رآس الزمن ملفوفه
والقايد المغوار قايد منصف
شجاعته طول الزمن موصوفه
#الشاعر_امين_الحارثي
راهن بربك يايمنا كيف
الانفجارات اصبحت مألوفه
تسمع مريكا والكيان المقرف
جبل نقم مااهتز من مقذوفه
ياسيدي جهز ليافا مشرف
نهاية الصهيونيه معروفه
#ابومالك_الكوماني
مادام واحنا في الطريق المنصف
بانحمل اشكال العــنا وصنـوفه
لــو كله العالم علينـا يقصف
ولو سـمانا باللظى مسقـوفه
الخزي والخسران عقبى المسرف
وكل أباطيل العدالة منسوفه
#ابوجهاد_صبر
ياكاتب التاريخ لحظه وقف
شوف اليمن با آمال شوفه
ذي قال دام القدس جالس ينزف
وأرض غزة دامره مقصوفه
والله ما حد مننا متوقف
لاما نرئ الباطل قرح من جوفه
يقصف كيان الشر واحنا نقصف
وبا يحق الحق بآخر طوفه
#ابوالحسن_الوهاشي
شعب اليمن يا اهل الحياد المقرف
مواقفه "ما غيرها" المألفوفه
الفرط يقسم والمسير يحلف
والمرحله بأوراقها مكشوفه
بلغ كيان الغدة المتعجرف
ما معذره ماينطحن غضروفه
#ابوحسين_رقبان
صنعاء وفيها عدل ربي منصف.
وبالمواقف والوفاء معروفه.
تقصف كيان الشر مهما يقصف.
يوم المخاطر حولها محفوفه.
اقدام واستمرار لن تتوقف.
حتى العدو يرفع شعار وقوفه
#ابوجراح-السلامي
على الشدائد شعبنا متكيّف
ماينحني لو يكتسر غضروفه
مانوقف الا كل موقف منصف
والتضخيه في نهجنا مألوفه
ياكربلاء طف القطاع المؤسف
ماهو جديد خذلان أهل الكوفه
#ابوكنن_محمد_منصر
صنعاء عصية والعلم بيرفرف
فوق الجبال الشمخ المعروفة
والله ثم الله لحلف وحلف
ان العداء في شعبنا مكفوفة
قل للتحالف والكيان المخلف
وكل خاين قد جمع مصروفة
#جميل_ابوقاسم
صنعاءعصيه بل واشرس واعنف
من عنف بن صهيون اومقذوفه
صنعاء اليمن بوعودها لن تخلف
وباالوفا والتضحيه معروفه
اليوم منهوه حر لابد يعرف
قد لعبة الغرب أصبحت مكشوفه
#ابوحمزة_المقاش
BY الشاعر ضيف الله سلمان
Share with your friend now:
tgoop.com/Dhaifsalman/9331