tgoop.com/Bnfs8/8627
Last Update:
كنت قاعدة بحقق مع نفسي في تهمة عدم إكمال مهمة كان المفترض أنجزها واتأخرت ..
وياهو قلت أجرب دور الجلاد
وبديت ألقي اللوم على نفسي وأطلع ألف حكم عليها وأبالغ يعني في الاتهام ..
جلد نظيف ..😂😂
المهم قلت بسم الله
استهدوا بالله واستغفروا يا أنا وأنا🤣🤣
وبديت أفكر في إني بجد لشنو اتأخرت؟
والأسباب كانت منطقية ..
غيرت النبرة ورجعت أدلع في نفسي
يا عائشة انتي زولة مجتهدة وما قاعدة تسوفي وما بتدخري مجهود
ودا كان فوق طاقتك وخارج عن إرادتك
لكن ما مشكلة هاك الورقة واكتبي خطة جديدة ..
فجأة من جلاد لشخصية حنونة ..
المهم
بجد حسيت إنو الكلام الطيب حفزني وخلاني أنعنش كدا وقعدت فعلا أرتب في أفكاري وجدولي
فخلصت للآتي :
من صور الرحمة إننا نرفق بنفسنا ونشفق عليها ونتفهمها
ونديها فرصة تانية
ما نقطع منها حبل الرجاء
ولا نقفل في وشها باب الأمل
ولا نقنع من الخير في نفسنا
ولا نمل من المحاولة مهما كررنا الفشل
ما نحكم علينا بعدم التغيير ونبدا نسمع في نفسنا ألف كلمة سيئة ومليون انتقاد عنيف ..
وما دااااااايما نوجه أصابع الاتهام ضدنا
بقدر ما إنو الأصابع دي مرات بنحتاج نطبطب بيها علينا ..
دي ما فلسفة مني😂😂
بس أحيانا بجد بنكون محتاجين إننا نهون على نفسنا ونخفف عليها
ما ممكن حزن عدم إنجاز ومعاها كمان جلد!
القسوة ما بتحل المشاكل أبدا أبدا
واللوم الكتير بثبط النفس أكتر مما إنو يدفعها
والحزن الشديد وكثرة العتاب بيفتر الهمة ويرخي العزيمة ..
والمبالغة في تكبير حجم الغلط دا في حد ذاتو أكبر غلط
إنت بشر
عندك قدرة محدودة وطاقتك بتستوعب قدر معين من المهام
فعادي جدا إننا نتعب ونقيف وتاني نقوم
نتمايل كدا ونقع لمن تستقيم ونصل ..
المشكلة وين؟
فما تعيش دور المثالي الخارق السوبر هيرو البينجز كل شي حسب ما خطط ووفق ما أراد
وإذا حصل خلل بسيط في الخطة خلاص يطلع عيوب نفسه عيب عيب ويكبر الموضوع ويعمل من الحبة قبة
وما يخلي لنفسو المسكينة دي حتة ترقد عليها من الجلد ..
يأذيها ويجرحها ويقلل من قيمتها عشان حاجة بسيطة يمكن ما عندو يد فيها أصلا؟
تقريبا الخطاب جوانا مفترض يبقى واعي
اللي هو أنا ما أبالغ في التهاون وأسهل على نفسي أي شي
ولا كمان أكون قاسي بشكل يقبح كل حاجة جميلة فيني ..
"ما كان الرفق في شيءٍ إلا زانه، ولا نُزعَ من شيءٍ إلا شانه"
حرفيا الرفق واللين بجمل كل حاجة
وحتى لو في غلط اللين بعدلو بصورة أحسن بكتير من القسوة ..
الكلمة الطيبة دي ما إلا لغيرنا
نحن برضو بنحتاج نقول لنفسنا كلام طيب ..
ونركز على حاجات جميلة ما بس نقعد نلاحق عيوبنا ونتصيد أخطاءنا
ما محتاجين سياط بقدر ما إننا بنحتاج متسع في صدرنا يحتوينا ..
وحكمة عائشية أخيرة :
الرحمة بالنفس وقود الاستمرار ..
#عائشة_تاج_السر
BY بنفسج💜
Share with your friend now:
tgoop.com/Bnfs8/8627