tgoop.com/Bnfs8/8600
Last Update:
بذكر أيام الحرب
كان طرأ علي شيء وكنت محتاجة مبلغ معين كدا ..
فاستحيت من أهلي في الظرف دا أطلبه
رغم إنه بجد كنت عايزاه😂
المهم قلت يا عائشة ما في حل غير الدعاء وربنا بدبر الأمر ..
بذكر قعدت أدعي وأناجي في ربنا وسبحان الله طول الجلسة ما ساورني شك أبدًا موقنة إنه ربنا حيجيب وما حيردني مع إنه كان الأمر _بمحدودية بصيرتي وقلة عقلي_ شبه مستحيل يعني ..
مرت الأيام
ونسيت الموضوع أصلًا
فمرة كدا كنت مضيعة شهادة مهمة وفجأة صحيت من النوم وهي بس في بالي
بس جواي شيء بلح إنه لازم ألقاها ..
مشيت نزلت الدولاب كلو في الأرض رف رف😂
وأقلب يمين وشمال
فجأة ألقى ظرف ما استوعبته الصراحة ولا افتكرته ..
جدعتو بعييييييد
وواصلت مداهمتي للأدراج وكل مكان ممكن ألقى فيه الشهادة دي ..
والحزينة إنه ولا أثرها ماف😂
المهم قنعت ورجعت لموضوع الظرف ..
يا ربي دا منو المرسل لي وأنا ما فتحتها؟🤣
اتخيلتها رسالة من إحدى الصديقات
كان معروف حبي للرسايل الورقية😂❤️
بس الكان محيرني إنو الظرف مليان يعني!
وأنا والله ما بذكره نهائيًا
فتحته فإذا بي ألقى قروش كتيرة جواه
بسم الله!
مسافة بعاين ليها
فاتذكرت إنه دي كانت مدخراتي أيام الجامعة والكنت بجمعها لمشروع ما اكتمل بسبب الحرب ..
عديتها ولقيتها بتغطي حاجتي وتزيد عليها كمان
وكل دا وحاسة إني بجد حلمانة ..
كيف ربنا وفقني لجمعها وحفظها وأنساني ذكرها ووقت حاجتي إذا بها تظهر وهي أصلًا ما كانت في بالي ولا في خاطري ..
ببحث عن شي تاني خالص
ومن يومها وأنا ازددت ثقة في حسن تدبير الله
وقرب فرجه
وسعة رحمته ..
وإنه كل ضيق ما كان لينا منه مخرج بنلقى إنه وسع بلطف ربنا وكرمه ..
فالحمدلله دائمًا وأبدًا على فضله الواسع ..
#عائشة_تاج_السر
BY بنفسج💜
Share with your friend now:
tgoop.com/Bnfs8/8600