tgoop.com/AsoaatHoseneua/6825
Last Update:
ماتت أمي ،، وصار كل عمري جحيم
ماتت امي ،، وهسه گلولي اليتيم
الله وياچ ييمه الله وياچ
يمه بالله امودعه
،،،،،،،،،،،،،،،،،،،،،،،،،،،،،،،،،،،،،،،،،،
العشت فوگ متونهه ،، ما تفتح عيونهه ؟
واني يمهه وانتظر اسمع حچيهه
التعبت بتربيتي ،،، أمي يا عافيتي
ساكته ودمعي النزل بلل أديهه
يمه شو ماكو الهلا
والچفوف مسبله
هسه المعاتب حلا
يمه يمه
عايفتني الدنيا موت
آه يا جرح السكوت
الجنه نظره وياهه صوت
يمه يمه
راح كلشي من گلت يمه وبجيت
راح كلشي هسه والله انه انتهيت
العمر صعبه نشيعه
يمه بالله مودعه
،،،،،،،،،،،،،،،،،،،،،،،،،،،،،،،،،
ساكته ويمج انوح ،، انتي روحي وين اروح
لو بعد ما ننجمع يمه سويه
العايشه بألله كريم ،، الجوه رجليهه النعيم
الذبلاهه الموت راحت هاي هيه
يا حظن بعدچ دفى
ويا گلب ميت صفى
يمه اخذتي العاطفه
يمه يمه
احچي خل اشتم هوى
الظلمه تحلم بالضوى
گلبي بعدچ ما روى
يمه يمه
بس ثواني اغفه بعيونچ وانام
بس ثواني گبل ليموت الحمام
گلبي يم گلبچ نعى
يمه بالله مودعه
،،،،،،،،،،،،،،،،،،،،،،،،،،،،،،
فاهيه الدنيا وراچ ،، كون ياخذني الخذاچ
ريت ياخذني الگبر ويعوفج انتي
الدافيه ام گلب الحنين ،، الدمعه تحلى وي الونين
من اشبگچ حيل واصرخ وين رحتي
ميته وايدج كلهه امان
شابگتني بكل حنان
وين وداچ الزمان
يمه يمه
يا طبيب بلا طبيب
يمه من بعدچ غريب
راح اعيش بلا حبيب
يمه يمه
رجعي لحظه يا وطن تحت التراب
رجعي لحظه فرگة عيونچ عذاب
صوتچ ولا نسمعه
يمه بالله امودعه
،،،،،،،،،،،،،،،،،،،،،،،،،،،،،،،،،،،،،،،،،
يمچ وانحب عليچ ،،،، ميته واتغطيني اديچ
رايحه ودارچ تظل وحشه اوخليه
بارد البيت وغطاه ،، والله فگدچ يتماه
آه يا جرحچ بعد شيسوي بيه
رجعي صاحولي الوحيد
يمه بس صوتچ اريد
العيد اجانه وماكو عيد
يمه يمه
العافيه التعبت حرام
جوه التراب وتنام
يمه احبچ والسلام
يمه يمه
اعذريني ،، هواي تعبتچ يشمعه
اعذريني ،، والله صاير كلي دمعه
هسه عشت الفاجعه
يمه بالله امودعه
،،،،،،،،،،،،،،،،،،،،،،،،،،
راح اعيش بلايه روح ،، وضحكة گليبي تروح
راح كلشي بعمري يتحول جنازه
تارك اعيوني وراي ،، صدري مخنوگ وهواي
والحظن محتاج للملگه وتوازه
نندفن شوگ وعتاب
وبيتنا الحدر التراب
والمگابر كلهه باب
يمه يمه
المي ورد چلمة تعال
سوي لوليدچ مجال
يمه يلكلچ حلال
يمه يمه
ونتلاگه ،،، مثل غيمه تلاگي غيمه
ونتلاگه ،،، وتنتهي جروحي القديمه
والچفوف أمشرعه
يمه بالله امودعه
كلمات خادم الحسين
رعد الفريجي
BY إبداعات حسينية
Share with your friend now:
tgoop.com/AsoaatHoseneua/6825