tgoop.com/Alphadli/35565
Last Update:
انا لله... ماتت زينب
انا لله.... وينه الينحب
هاي المحد بالشام الها
خل نمشي نگل للكافلها
باب الساعات الكاتلها.... انا لله
//////////////////////////////////////
اعز مخلوقة أعله الله وينها اوين الخرابه
لبيت أبوها ودو طارش كعدوها أعله الترابه
امن اول احجاره اشمروها وضاعت اخبار المهابه
حسبالنه امن الكوفه ترتاح
بس مادرينه الشام ذباح
مالان گلب الشام ما لان
اسباب هاي الميته ديوان
انا لله.... عالعلويه
انا لله... عالمسبيه
هاي التعبت من غربتها
بت الزهره وسبعه اخوتها
أجّوت ضيم وسومر ضلها... انا لله
/////////////////////////////////////
بياذنب عمة اسكينه تنضرب من آل اميه
امحرگات اثنين اديها وگاعده اداوي برقيه
اهدوم اخوها اتقاسموها وماحجت لو جلمه هيه
بالسنه ونص والحال ياحال
ما رايحه آثار الاحبال
محروگ گلب الزهره محروگ
امن السوگ مدري وادم السوگ
انا لله... عالمهضومه
انا لله... عالمضيومه
لا من عاشت شافت راحه
ولا ماتت زينب مرتاحه
هاي الحنت للدللها.... انا لله
//////////////////////////////////////
كل سطح بالشام نبله ومدري جم عبدالله عدها
اهنا بده شوط البواجي امسابگ ايطيح اعله خدها
بشامها العيّاله كثرت وماكو نغّار اليردها
يتشمتون الفوگ الاسطوح
وشبعو بواجي الجوّه الاسطوح
هاي العشيرتها مجاتيل
سمعت حجي اثگل امن الخيل
انا لله... علتعبانه
انا لله... علعطشانه
محد قدرها امن الوادم
ويعرفوها عزيزة هاشم
شو بالفرحه اتعاين كلها... انا لله
////////////////////////////////////
كافي شبعت دهر غربه وندري بيها اشگد حنينه
لاهي ماتت يم ابوها ولاهي ماتت بالمدينه
الشام يادفان يذبح جيبها يم ابو سكينه
جم دوب هاي الغربه جم دوب
كافي اشبعت من كيفها اغروب
مو ناسها اهل الشام ياناس
تدروها ترتاح اويه عباس
انا لله.... عالمتغربه
انا لله... عالمتعذبه
المن بالشام امخليها
كون لعباس نوديها
شهذا الشام الما لاگلها... انا لله
/////////////////////////////////////
ام عون يا اول اجنازة مامش اصياح بوراها
اهنا ولا شامي تنگب من اجه الموت وخذاها
اهنا ولا واحد معمم طيّح اعمامه بگفاها
ومادام هيجي الشام مادام
خلها البواجي اتغرگ الشام...
والموت كون ايلوحنه الموت
تطلب صوايح عله التابوت...
انا لله... لبت الزهره
انا لله... ماتت حسره
يمتى ايدلينه اعله اصوابه
عدنه اويه اهل الشام طلابه
والمالت هوه اليعدلها... انا لله
اللهم عجل لوليك الفرج
اللهم عجل لوليك الفرج
اللهم عجل لوليك الفرج
احمد ماجد الكلابي
BY قناة قصائد والحان في رحاب الحسين ع
Share with your friend now:
tgoop.com/Alphadli/35565